Ўзбекистонда пахтани қайта ишлаш учун бино ва иншоотлар бўлиб тўлаш шарти билан сотилади. Бу ҳақда Norma хабар берди.

Маълум қилинишича, Вазирлар Маҳкамасининг 10 декабрдаги «Пахта-тўқимачилик кластерлари фаолиятини янада кенгайтириш чора-тадбирлари тўғрисида»ги қарори қабул қилинган. Ҳужжат Вазирлар Маҳкамасининг «Пахта-тўқимачилик ишлаб чиқаришлари ва кластерлари фаолиятини ташкил этиш бўйича қўшимча чора-тадбирлар тўғрисида» 2018 йил 31 мартдаги қарорига мувофиқ ишлаб чиқилган.

Қайд этилишича, пахта тозалаш корхоналари ҳамда пахта қабул қилиш масканларининг бино ва иншоотлари тўғридан-тўғри пахта-тўқимачилик кластерлари ташкилотчиларига баҳоланган қийматда 5 йил муддатда бўлиб тўлаш (тенг миқдордаги йиллик тўловлар) шарти билан сотилади.

Шунингдек, қабул қилинган ҳужжатда пахта тозалаш корхоналари ва пахта қабул қилиш масканларининг бино ва иншоотлари ишлаб чиқаришни 2 йилдан ортиқ бўлмаган вақт давомида модернизация қилиш шарти билан сотилиши белгиланган.

Бундан ташқари, пахта тозалаш корхоналари ва пахта қабул қилиш масканларининг бино ва иншоотларини сотиш бўйича шартномада назарда тутилган мажбуриятлар ўз вақтида ва тўлиқ бажарилмаган тақдирда, томонлар ўртасида тузилган шартнома қонунчилик ҳужжатларида белгиланган тартибда бекор қилинади.

Ҳужжат қонун ҳужжатлари маълумотлари миллий базасида эълон қилинган ва 10 декабрдан кучга кирган.

Аввалроқ Ўзбекистонда пахта-тўқимачилик кластерларини ташкил этиш тартиби белгилангани хабар қилинганди. Шунингдек, Ўзбекистонда пахта етиштириш ва йиғим-теримни молиялаштириш учун имтиёзли кредитлар ажратилиши ҳақида хабар берилди.