Ўзбекистонда расмий ҳужжатларга апостиль қўйишни электрон амалга ошириш мумкин бўлади
«E-App» ва «E-register» дастурлари орқали ҳужжатларга апостиль қўйиш 2022 йил 1 мартдан ишга тушади
Ўзбекистонда ҳукуматнинг 3 декабрдаги қарори билан расмий ҳужжатларга апостиль қўйиш бўйича давлат хизмати кўрсатишнинг маъмурий регламенти тасдиқланди. Бу ҳақда Адлия вазирлигининг Huquqiy axborot канали хабар берди.
Регламентга кўра, расмий ҳужжатга апостиль қўйиш, мурожаат этувчининг ўз хоҳишига кўра, анъанавий ёки электрон тарзда амалга оширилади. Мурожаат этувчи давлат хизмати олиш учун ДХМга ўзи келиб ёки ЯИДХПда рўйхатдан ўтган ҳолда электрон тарзда мурожаат этади.
Шундан сўнг, сўровнома тўлдирилиб, уни кўриб чиқиш учун тегишлича йиғим ундирилади. Йиғим таълим ва фан соҳаси ташкилотларидан чиқадиган расмий ҳужжатлар бўйича — БҲМнинг 20 фоизи, адлия органлари ва муассасаларидан ҳамда фуқаролик ҳолати далолатномаларини қайд этиш органларидан чиқадиган расмий ҳужжатлар бўйича — БҲМнинг 20 фоизи, бошқа ҳужжатлар бўйича — БҲМнинг 10 фоизи миқдорида ундирилиади.
Қайд этилишича, ЯИДХП орқали мурожаат этилганда, йиғим суммасининг 90 фоизи ундирилади. Шунингдек, сўровнома расмий ҳужжатлар тақдим этилган кундан бошлаб 2 иш куни ичида кўриб чиқилади.
Таъкидланишича, қуйидагиларга апостиль қўйилмайди:
- чет элда Ўзбекистоннинг дипломатик ваколатхоналари ёки консуллик муассасалари томонидан содир этилган расмий ҳужжатларга;
- тижорат ёки божхона операцияларига тўғридан-тўғри алоқадор бўлган расмий ҳужжатларга;
- Ўзбекистон фуқаролик паспортига, идентификация ID-картасига, ҳарбий билетга.
Шу билан бирга, расмий ҳужжатга апостиль қўйиш билан боғлиқ барча жараёнлар «E-App» ва «E-register» дастурларидан фойдаланган ҳолда амалга оширилади. Шунингдек, баъзи ҳолларда апостиль қўйиш рад этилиши мумкин.
Жумладан, расмий ҳужжатда зарур реквизитларнинг ҳеч бўлмаганда бири мавжуд бўлмаса ёки мансабдор шахсларнинг имзолари ҳамда муҳр, штампларнинг ҳақиқий эмаслиги аниқланса ҳамда расмий ҳужжатни имзолаган мансабдор шахс уни имзолаш ваколатига эга бўлмаганда апостиль қўйиш рад этилади. Мазкур тартиб 2022 йил 1 мартдан амалга киритилади.
Аввалроқ Ўзбекистонда айрим давлат хизматлари учун тўловлар қисқартирилиши хабар қилинганди. Шунингдек, Ўзбекистонда авиаюклар ташувини электрон расмийлаштириш учун «е-Freight» халқаро стандарти жорий этилиши ҳақида хабар берилди.
