Ўзбекистонда суғурталовчи ва қайта суғурталовчининг масъул шахсига қўйиладиган талаблар ўзгартирилди. Бу ҳақда Norma хабар берди.

Маълум қилинишича, Молия вазирининг буйруғи билан Суғурталовчи ва қайта суғурталовчининг инвестиция фаолияти тўғрисидаги низомга қўшимча ва ўзгартиришлар киритилган.

Киритилган қўшимча ва ўзгартиришларга мувофиқ, қонунчилик ҳужжатларига бўйича чиқарилган корпоратив облигациялар ҳам суғурталовчи (қайта суғурталовчи) инвестиция фаолиятининг объектлари ҳисобланади.

Шунингдек, инвестиция фаолиятини ташкил этиш бўйича суғурталовчининг (қайта суғурталовчининг) масъул шахси қуйидаги малака талабларига мос келиши лозим:

• Ўзбекистон олий таълим муассасаларида олинган олий (иқтисодиёт, молия, бухгалтерия, математика, ахборот технологиялари соҳаларида) маълумотга ёки хорижий давлатларнинг таълим муассасаларида олинган ҳамда қонунчилик ҳужжатларига мувофиқ Ўзбекистонда тан олинган олий (иқтисодиёт, молия, бухгалтерия, математика, ахборот технологиялари соҳаларида) маълумотга эга бўлиши;
• юридик шахснинг молиявий ва иқтисодий фаолияти билан бевосита боғлиқ бўлган 1 йилдан кам бўлмаган иш стажига эга бўлиши (ёрдамчи, техник ва хизмат кўрсатувчи ходимлар лавозимларидаги иш стажи ҳисобга олинмайди).

Бундан ташқари, масъул шахс баъзи ҳужжатлардан бирига эга бўлган тақдирда, унга иш стажига эга бўлиш бўйича талаб қўйилмайди. Жумладан, «Сертификатланган ички аудитор (CIA)» ёки «Сертификатланган молиявий таҳлилчи (CFA)» халқаро сертификатлари ушбу ҳужжатлар сирасига киради.

Шу билан бирга, «Сертификатланган халқаро профессионал бухгалтер (CIPA)», «Сертификатланган дипломли бухгалтер (ACCA)», «Халқаро молиявий ҳисобот бўйича диплом (DipIFR)» ёки «Сертификатланган жамоатчи бухгалтер (CPA)» халқаро бухгалтерлик сертификатлари мавжуд бўлса ҳам иш стажига эга бўлиш бўйича талаб қўйилмайди.

Шунингдек, «Сертификатланган риск менежери (CRM)» ёки «Молиявий риск менежери (FRM)» таваккалчиликни бошқаришга оид халқаро сертификатлари эга шахслардан инвестиция фаолиятини ташкил этишда стаж талаб қилинмайди. Ҳужжат қонун ҳужжатлари маълумотлари миллий базасида эълон қилинган ва 22 декабрдан кучга кирган.

Аввалроқ Хорижий сармоя асосида лойиҳаларни тайёрлаш ва амалга ошириш тартиби ўзгартирилгани хабар қилинганди. Шунингдек, Ўзбекистонда суғурта фаолиятини такомиллаштириш бўйича қонун имзолангани ҳақида хабар берилди.