Ўзбекистонда сув объектларининг хусусий секторга берилиши мумкин бўлади
Президент сув объектларидан фойдаланиш қонунига киритиладиган ўзгартиш ва қўшимчаларни имзолади
Шавкат Мирзиёев «‘Сув ва сувдан фойдаланиш тўғрисида’ги Ўзбекистон Республикаси Қонунига ўзгартиш ва қўшимчалар киритиш ҳақида»ги қонунни имзолади.
Маълум қилинишича, қонунга кўра сув истеъмолчилари уюшмаларининг сувни истеъмол қилиш қоидалари бузилганда ёки аъзолик бадали ва бошқа тегишли тўловлар тўланмаганда сув беришни вақтинча тўхтатиб қўйиш ёки сувни истеъмол қилиш ҳуқуқини бекор қилиш бўйича ҳуқуқлари белгиланган.
Шунингдек, сув объектлари (стратегик объектлардан ташқари) қонунчилик ҳужжатларида белгиланган тартибда давлат-хусусий шериклик тамойиллари асосида хусусий секторга берилиши мумкин бўлади.
Бундан ташқари, сувни тежайдиган технологияларни жорий қилганлиги учун давлат бюджетидан субсидия олганлар ушбу лойиҳалардан камида беш йил самарали фойдаланишлари кераклиги қайд этилган. Шунингдек, шўри ювиладиган ерлар лазер ускуналар ёрдамида ҳар уч йилда камида бир марта текисланиши шартлиги белгиланмоқда.
Таъкидланишича, қонун билан сув объектларидан саноат ва иссиқлик энергетикаси билан бир қаторда атом энергетикаси эҳтиёжлари учун фойдаланувчилар мажбуриятлари белгиланиб, уларга сувнинг ифлосланишини меъёрдан оширмаслик талаби қўйилмоқда.
Шу билан бирга, сув объектлари балиқчилик хўжаликларини ташкил этиш учун хусусий секторга берилиши мумкинлиги белгиланмоқда. Бунда объектлардан фойдаланиш тартиби Вазирлар Маҳкамаси томонидан белгиланади.
Аввалроқ Ўзбекистонда томорқаларни суғориш харажатларини қисман қоплашга 50 миллиард сўм ажратилиши хабар қилинганди. Шунингдек, Амударё ва Сирдарё ҳавзасида сув ресурслари камайиши мумкинлиги ҳақида хабар берилди.