Ўзбекистонда тотализаторни реклама қилувчи 30 дан ортиқ сайт блокланди
Ўтказилган 1105 та ўрганишнинг 102 та ҳолатида тотализатор рекламаси аниқланган.
Ўзбекистонда 2021 йил тотализаторни реклама қилувчи 30 дан ортиқ сайт блокланди. Бу ҳақда АОКАда ўтказилган брифингда Истеъмолчилар ҳуқуқларини ҳимоя қилиш агентлиги матбуот котиби Моҳрухсор Тоғаева маълум қилди.
Қайд этилишича, 2021 йил 30 дан ортиқ тотализатор ва букмекерлик рекламасини ноқонуний равишда юритувчи сайтларга кириш чеклаб қўйилди. Бу соҳадаги ишлар давом этаётгани маълум қилинди.
Шунингдек, ўтказилган 1105 та ўрганишнинг 102 та ҳолатида тотализатор рекламаси аниқланган ва уларнинг барчаси бартараф этилган.
Маълум қилинишича, агентлик томонидан 2021 йил мобайнида 27 мингга якин ўрганиш ўтказилган. Шундан 15 минг 486 ҳолатда турли камчиликлар аниқланган ва уларни бартараф этиш чоралари кўрилган.
Аввалроқ Ўзбекистонда тотализатор ва букмекерлик фаолиятини реклама қилаётган ўндан ортиқ сайтга кириш чеклангани ҳақида хабар берилганди.