Ўзбекистонда уруғлик чигит ва дон тайёрлаш цехларига 26,5 млн доллар ажратилади
Уруғчиликни ривожлантириш марказига бир қатор қўшимча вазифалар юклатилди.
Ўзбекистонда уруғлик чигит ва дон тайёрлаш цехларини модернизация қилишга 26,5 миллион доллар йўналтирилади. Бу ҳақда Адлия вазирлигининг Huquqiy axborot канали хабар берди.
Маълум қилинишича, «Қишлоқ хўжалиги экинлари уруғчилигини янада ривожлантириш бўйича қўшимча чора-тадбирлар тўғрисида»ги Президент қарори қабул қилинган.
Қарор билан Уруғчиликни ривожлантириш марказига бир қатор қўшимча вазифалар юклатилган. Марказ пахта, бошоқли дон, сабзавот, полиз, мойли, дуккакли ва озуқа экинлари уруғликларини ички ва ташқи бозорга Uzbek seeds миллий бренди асосида сотишни ташкил этади.
Қайд этилишича, «Ўзпахтасаноат» корхонасининг 11 та уруғлик чигит тайёрлаш цехлари марказга берилган. Шунингдек, уруғлик тайёрлаш цехларини марказга ўтказиш бўйича Идоралараро ишчи гуруҳ тасдиқланган.
Таъкидланишича, уруғлик чигит ва уруғлик дон тайёрлаш цехларини 2022–2023 йилларда тўлиқ модернизация қилиш бўйича «йўл харитаси» ишлаб чиқилади (унинг ижросига 26,5 миллион доллар йўналтирилади).
Бундан ташқари, 2022–2025 йилларда пахта ҳосилдорлиги 50 центнерга, бошоқли дон 90 центнерга етказилади. Шунингдек, 200 минг гектар суғориладиган ер қишлоқ хўжалиги экинлари уруғликларини етиштиришга ихтисослаштирилади.
Агрокластерлар ва фермер хўжаликларига ғўза ва бошоқли дон экинларининг энг ҳосилдор навларини импорт қилишга, уларни мустақил жойлаштиришга рухсат берилади.
Аввалроқ Ўзбекистонда пахта-тўқимачилик кластерларини ташкил этиш тартиби белгилангани ҳақида хабар берилганди. Шунингдек, Ўзбекистонда пахта етиштириш ва йиғим-теримни молиялаштириш учун имтиёзли кредитлар ажратилиши ҳақида хабар берилди.