Ўзбекистонда январь ойида қанча ичимлик ишлаб чиқарилгани маълум бўлди
Маҳсулот ишлаб чиқаришда энг юқори улуш Тошкент шаҳрига тўғри келди.
Ўзбекистонда январь ойида 535,9 миллиард сўмлик ичимлик маҳсулотлари ишлаб чиқарилди. Бу ҳақда Давлат статистика қўмитаси матбуот хизмати хабар берди.
Маълум қилинишича, Ўзбекистон 2022 йилнинг январь ойи давомида жами фаолият юритаётган 850 та ичимлик ишлаб чиқариш саноати корхоналари томонидан 535,9 миллиард сўм қийматга тенг бўлган маҳсулотлар ишлаб чиқарилган. Тармоқнинг 2021 йилнинг январь ойларига нисбатан физик ҳажм индекси 120,5 фоизни ташкил этган.
Қайд этилишича, ичимликлар ишлаб чиқариш саноати корхоналари томонидан республика миқёсида ишлаб чиқарилган маҳсулотларнинг жами ҳажмида энг юқори улуш Тошкент шаҳри — 45,6 фоиз (165 та ичимлик ишлаб чиқариш саноати корхоналари томонидан), Тошкент вилояти — 32,5 фоиз (136 та) ҳамда Хоразм вилояти — 5,5 фоиз (31 та) ҳиссасига тўғри келган.
Аввалроқ Маҳсулот ишлаб чиқариш ва саноат кооперациясини кенгайтириш дастури қабул қилингани хабар қилинганди. Шунингдек, Ўзбекистонда озиқ-овқат маҳсулотлари ишлаб чиқарувчиларга субсидиялар ажратилиши ҳақида хабар берилди.
