Ўзбекистондаги барча мактабларда бошланғич синф ўқувчилари бепул овқат билан таъминланади
2023/2024 ўқув йилидан республиканинг барча вилоятлари ва Тошкент шаҳрида бошланғич синф ўқувчиларини бепул овқат билан таъминлаш йўлга қўйилади
«Тараққиёт стратегияси» маркази 2023 йилги давлат дастурига оид Президент фармони лойиҳасини жамоатчилик муҳокамаси учун эълон қилди. Унга кўра, таълим сифатини ошириш мақсадида бир қатор вазифалар белгиланмоқда.
Хусусан, 2023 йил 1 сентябрдан ҳар бир туман (шаҳар)даги биттадан мактабда ўқувчиларни 2 та хорижий тил ва битта касб-ҳунарга ўргатиш амалиёти йўлга қўйилади.
2023/2024 ўқув йилидан:
- босқичма-босқич янги ўқув дастурлари амалиётга киритилади;
- республиканинг барча вилоятлари ва Тошкент шаҳрида бошланғич синф ўқувчиларини бепул овқат билан таъминлаш йўлга қўйилади;
- давлат грантлари коллеж ва техникумларнинг дуал таълим шакли бўйича ҳам ажратилади.
Шу билан бирга, 2023 йил 1 апрелдан мактабгача таълим қамровини кенгайтириш мақсадида:
- янги давлат боғчаларини кўп квартирали уйларнинг нотурар қаватларида ёки бошқа уйларни сотиб олиб ташкил этишга рухсат этилади;
- давлат-хусусий шериклик асосида ижарага берилган ерда хусусий боғчани қурган хусусий шерикка ушбу бинони мазкур лойиҳа учун банк кредитлари бўйича гаровга қўйишга оид чекловлар бекор қилинади.
Аввалроқ ҳукумат қарори билан Умумий ўрта таълим тўғрисидаги электрон шаҳодатномаларни бериш тартиби ҳақидаги низом тасдиқлангани тўҳрисида хабар берилганди. Буюртма бериш ва шаҳодатномани шакллантириш «Электрон шаҳодатнома» ахборот тизими орқали амалга оширилади.