Ўзбекистондаги ҳудудлар инвестицион муҳитининг Миллий рейтинги ишлаб чиқилади
Тизим лойиҳаларни танлаш ва амалга оширишнинг шаффофлигини таъминлайди
Ўзбекистонда ҳудудлар инвестицион муҳитининг Миллий рейтинги ишлаб чиқилмоқда. Бу ҳақда АОКАда ўтказилган брифингда Стратегик ривожланиш агентлиги ахборот хизмати раҳбари Манзура Ҳасанова маълум қилди.
Хабар берилишича, инвестиция ва ташқи савдо соҳасида қатор муаммо ва камчиликлар аниқланган. Мисол учун, муайян ҳудуд учун энг самарали бўлган лойиҳаларни танлаш ва амалга оширишнинг шаффоф тизими жорий этилмаган.
Бу, ўз ўрнида, баъзи амалдаги лойиҳаларнинг зарар кўриб ишлашига, уларнинг экспорт салоҳияти йўқолишига олиб келади. Шунингдек, лойиҳалар ижросини мувофиқлаштириш ва назорат қилишда тизимли ёндашув йўқлиги сабаб лойиҳаларни амалга оширишда расмиятчилик ва муддатларнинг асоссиз чўзилиши ҳолатлари мавжуд.
Муаммолар ечими сифатида агентлик лойиҳаларни танлаш ва амалга оширишнинг уч даражали тизимини ташкил этишни таклиф қиляпти. Бунга кўра, тизим Инвестициялар ва ташқи савдо вазирлиги ҳузуридаги Лойиҳа офиси, 14 та ҳудудий ва 207 та туман-шаҳар лойиҳа гуруҳлари асосида ишлаши кўзда тутилган.
Аввалроқ Марказий банк вакиллари экспертлар билан инвестиция салоҳиятини муҳокама қилгани ҳақида хабар берилганди. Шунингдек, Ўзбекистонда инвестиция дастурлари доирасида 18,5 триллион сўмлик лойиҳалар амалга оширилиши хабар қилинди.