Ўзбекистонлик тадбиркор очган ошхона АҚШда энг яхши 10 та ресторан қаторига кирди
Мижозларнинг 90 фоизи илгари ўзбек миллий таомларини татиб кўрмаган.
Yelp халқаро тавсиянома хизмати асли ўзбекистонлик Шейн Шамансуровнинг ресторанини АҚШнинг энг яхши 10 та овқатланиш шохобчаси қаторига киритди.
Маълум қилинишича, Шамансуровнинг муассасаси OSH Restaurant & Gril деб номланган ва у ерда ўзбек ҳамда Яқин Шарқ таомлари тайёрланади. Энг машҳур таомлардан бири паловдир. Шунингдек, мижозлар қўй гўштидан тайёрланган манти, кабоб ва гумусни кўпинча мақташади.
Ресторан 2020 йил охирида очилган. Шамансуровнинг айтишича, ресторанни дунёни COVID-19 пандемияси қамраб олмаганида ишга тушириш тўғрироқ бўлар эди.
«Кўп мижозлар бизга ресторан очиш учун энг ёмон вақтни танлаганимизни айтарди», — дейди Шамансуров Channel5 сайтига берган интервьюсида.
Унинг сўзларига кўра, у 42 йилдан бери ресторан соҳасида ишлаган отасининг ишини давом эттирмоқда. OSH Restaurant & Grill’га ташриф буюрганларнинг 90 фоизи илгари ўзбек таомларини татиб кўрмаган ва уларнинг аксарияти доимий мижозларга айланган.
Yelp рейтингига Қўшма Штатлардаги 100 та энг яхши ресторанлар киритилган. Уларнинг орасида Michelin ва James Beard томонидан тақдирланганлар бор.
«Бу ерда бутун оилам яшайди. Мен уларга қўнғироқ қилдим, тўққизинчи ўринни олганимизни айтдим. Улар шаҳар бўйичами деб сўради. Мен эса бутун Америкада дедим», — дейди Шамансуров.
