Ўзбекистоннинг МДҲ давлатлари билан савдо айланмаси январь ойи қанчага етгани очиқланди
Ҳамдўстлик давлатлари орасида савдо айланмасининг энг юқори ҳажми Россия Федерацияси билан қайд этилган.
2022 йилнинг январь ойида Ўзбекистон Республикаси ташқи савдо айланмасининг учдан бир қисми ёки 32,4 фоизи Мустақил давлатлар ҳамдўстлиги мамлакатларига тўғри келиб, ташқи савдо айланмасидаги 2021 йилнинг мос даврига нисбатан улуши 8,0 фоизга кўпайган.
Бошқа хорижий давлатлар билан савдо ҳажми 2022 йилнинг январь ойида 2021 йилнинг мос даврига нисбатан 8,0 фоизга камайиб, мамлакат ташқи савдо айланмасидаги жами улуши 67,6 фоизни ташкил этган.
Ўзбекистон Республикасининг МДҲ мамлакатлари билан ташқи савдо айланмаси 2022 йил январь ҳолатига кўра 1 миллиард 134,1 миллион долларни ташкил этди. Шундан экспорт — 387,0 миллион долларга етган бўлса, импорт — 747,1 миллион доллар қийматида қайд этилган.
МДҲ мамлакатлари билан ташқи савдо айланмасининг энг юқори ҳажмлари Россия Федерацияси (50,5 фоиз), Қозоғистон (23,5 фоиз) ҳамда Қирғизистон Республикаси (5,3 фоиз) давлатлари билан қайд этилди.
Аввалроқ Ўзбекистоннинг январь ойидаги ташқи савдо айланмаси 3,5 миллиард долларга тенг бўлгани хабар қилинганди.
Маълумот учун, Ўзбекистоннинг МДҲ мамлакатлари билан ташқи савдо айланмаси 2021 йил январь-декабрь ҳолатига кўра 15,9 миллиард долларни ташкил этган.
