Ўзбекистоннинг ташқи қарзи 2023 йилда 32,6 млрд долларни ташкил этиши прогноз қилинди
Молия вазири Тимур Ишметов қуйи палатанинг навбатдаги йиғилишида 2023 йилда бюджет даромадлари ва харажатлари тўғрисида маълумот берди
Ўзбекистонда 2023 йилда ялпи ички маҳсулотнинг ўсиш суръати 5,3 фоиз миқдорда бўлиши мумкин. Бу ҳақда молия вазири Тимур Ишметов Олий Мажлис Қонунчилик палатаси мажлисида маълум қилди.
Таъкидланганидек, қонун лойиҳаси ва Бюджетномада ялпи ички маҳсулотнинг ўсиш сурати 5,3 фоиз миқдорда бўлиши назарда тутилмоқда. Хусусан, саноат ишлаб чиқариш ҳажми 5,1 фоиз, қурилиш 6,0 фоиз, қишлоқ хўжалиги 3,5 фоиз, хизматлар соҳаси 6,7 фоизга ортиши кутилмоқда. 2023 йилда мамлакатнинг ялпи ички маҳсулоти 1068,0 триллион сўмни, Давлат бюджети даромадлари 232,1 триллион сўм ёки ялпи ички маҳсулотга нисбатан 21,7 фоиз даражасида бўлиши кутилмоқда.
«Консолидацияланган бюджет даромадлари 311 триллион сўм атрофида, харажатлари эса 343 триллион сўм атрофида режалаштирилмоқда, шунда дефицит 32,5 триллион сўм бўлиши кутилмоқда», — дейди Ишметов.
2023 йилдан бошлаб консолидациялашган бюджет тақчиллигининг чекланган микдори ялпи ички маҳсулотга нисбатан 3 фоиздан ошмаслиги белгиланмоқда.
Давлат бюджетининг харажатлари (давлат мақсадли жамғармаларига ажратиладиган трансфертлар билан бирга ) 257,7 триллион сўмни, ялпи ички маҳсулотга нисбатан 24,1 фоизни ёки 2022 йил кутилаётган ижрога нисбатан 18,9 трлн. сўмга ортиши прогноз қилинмоқда.
Ўзбекистоннинг ташқи қарзи 2023 йилда 32,6 млрд долларни ташкил этиши прогноз қилинди.
Шунингдек, 2023 йилда 4,5 миллиард доллар ташқи қарз жалб қилиниши маълум қилинди.
