Palm компанияси Buds Pro симсиз қулоқчинларини тақдим этди
Аксессуар 129 доллардан сотувга чиқарилади
Palm компанияси бренднинг биринчи симсиз қулоқчинлари — Buds Pro’ни расман тақдим этди. Қулоқчинлар 9 ноябрдан бошлаб 129 доллардан сотувга чиқарилади.
Аксессуар Level, IconX Buds ва Galaxy Buds’ни яратган Samsung муҳандислари, шунингдек, Beats by Dr Dre мутахассислари томонидан ишлаб чиқилган. Buds Pro ҳар бир қулоқчинда фаол шовқинни бартараф этиш учун масъул бўлган ўн миллиметрли динамиклар ва 3 та микрофонга эга. Мослама намликдан ҳимоя қилиш учун IPX4 стандарти бўйича сертификатланган.
Янги Buds Pro шовқинни йўқотиш функцияси билан бир марта қувватланганда тўрт ярим соатгача хизмат қилади. Зарядлаш қутиси 24 соатгача «автономия»ни таъминлайди.
Маълумот учун, 1992 йилда ташкил этилган Palm ўзининг чўнтак шахсий компьютерлари ва Palm OS асосидаги смартфонлари билан машҳур. 2010 йилда компания ёпилди, бренд Hewlett-Packard компаниясига сотилди ва 2014 йилда TCL корпорацияси бренднинг янги эгасига айланди.
Аввалроқ Microsoft дунёдаги энг қиммат компанияга айлангани ҳақида хабар берилганди.
