Президентнинг етим қизларни уй-жой билан таъминлашга оид фармонига ўзгартиш киритилди
Уй-жой бериш тартиби онасидан айрилган, ёлғиз ота қарамоғидаги қизларга ҳам татбиқ этилади
Шавкат Мирзиёевнинг 23 ноябрдаги «Ўзбекистон Республикаси Президентининг айрим ҳужжатларига ўзгартиришлар киритиш тўғрисида»ги фармони қабул қилинди. Бу ҳақда Norma хабар берди.
Киритилган ўзгартиришларга асосан, 2021 йилда уй-жой шароитларини яхшилашга муҳтож бўлган фуқаролар, шу жумладан хотин-қизларни ижара ҳуқуқи асосида вақтинчалик жойлаштириш учун уй-жойларни сотиб олиш параметрларининг янги таҳрири тасдиқланган (Президентнинг 2021 йил 11 мартдаги фармонига 5-илова). Хусусан, ҳар бир ҳудуд кесимида сотиб олинадиган квартиралар сони ўзгарган. Бунда уларнинг умумий сони ўзгаришсиз қолган ва мингтани ташкил этади.
Шунингдек, Қорақалпоғистон бюджети, вилоятлар ва Тошкент шаҳар маҳаллий бюджетлари маблағлари ҳисобидан уй-жой билан таъминлаш нормаси (Президентнинг 2021 йил 3 мартдаги фармонининг 6-банди «а» кичик банди 3-хатбоши) ота-онасидан ёки уларнинг биридан айрилган ҳамда ёлғиз онаси, ёлғиз отаси ёки бошқа шахслар қарамоғида бўлган (илгари — отасидан айрилган, ёлғиз онаси қарамоғида бўлган уй-жойга муҳтож) қизларга ҳам татбиқ этилади.
Ҳужжат қонун ҳужжатлари маълумотлари миллий базасида эълон қилинган ва 23 ноябрдан кучга кирган.
Аввалроқ Ўзбекистонда 25 ёшгача бўлган ходимларга тўланган ижтимоий солиқ суммаси қандай қайтариб олиниши хабар қилинганди. Шунингдек, Ўзбекистонда талабалар билан тузилган ижара шартномаларини E-ijara тизимига киритиш мумкинлиги ҳақида хабар берилди.