Владимир Путин ва Си Цзиньпин газ етказиб бериш бўйича янги келишувни эълон қилди. Бу ҳақда Россия Президентининг матбуот хизмати хабар берди.

Пекинда Қишки Олимпия ўйинлари очилиш маросими олдидан Россия президенти Владимир Путин ва Хитой раҳбари Си Цзиньпин музокара ўтказган. Учрашувда икки давлат раҳбарлари давлатлар ўртасида «мисли кўрилмаган» муносабатлар ривожланиб бораётгани ва ўзаро ишонч мустаҳкамлангани ҳақида маълум қилган.

Шунингдек, Путин Россия янги шартнома асосида Хитойга Узоқ Шарқдан йилига 10 миллиард куб метр газ етказиб беришини айтган. Шундан сўнг дарҳол «Роснефть» ва «Газпром» Хитойнинг CNPC компанияси билан янги шартномалар ҳақида эълон қилган.

«Бугунги учрашувимиз учун нефтчиларимиз Хитой Халқ Республикасига углеводородлар етказиб бериш бўйича жуда яхши янги ечимларни тайёрлади ва бу билан газ саноатида яна бир қадам ташланди. Мен йилига 10 миллиард куб/метр газни Россиянинг Узоқ Шарқидан Хитойга газ етказиб бериш бўйича янги шартномани назарда тутяпман», — деган Путин.

Унинг таъкидлашича, Россия ва Хитой ўртасидаги муносабатлар мамлакатлар тараққиётида бир-бирига қандай ёрдам бераётганининг муносиб намунасидир. Ўз навбатида Си Цзиньпин Хитой ва Россия ўртасидаги сиёсий ва стратегик ўзаро ишонч пандемиянинг оғир даврига қарамай мустаҳкамланиб бораётганини айтган.

«Биз шундай ҳаракат қилишда давом этамиз, сиз билан янги тарихий даврда Хитой-Россия муносабатларини ривожлантириш режасини ишлаб чиқиш учун саъй-ҳаракатларни давом эттирамиз. Мамлакатларимиз ўртасидаги ўзаро ишончни икки халқнинг умумий манфаатлари учун амалий ҳамкорликка айлантиришга интиламиз», — деган Си Цзиньпин.

Аввалроқ Си Цзиньпин Бердимуҳамедовга газ таъминотида «янги босқич»га кўтарилишни таклиф қилгани ҳақида хабар берилганди.