Путин йирик бизнес вакиллари билан учрашувда «маълум воқеалар»дан кейинги иқтисодий вазият ҳамда Федерал Мажлисга мактуб юборишга тайёргарлик кўришни муҳокама қилмоқчи. Бу ҳақда Президент матбуот котиби Дмитрий Песков маълум қилди.

Песковнинг сўзларига кўра, Путин ишбилармонлар билан учрашувда Федерал мажлисга мактуб юборишга тайёргарлик ҳақида гаплашади. Йиғилишда иқтисодиётнинг турли соҳаларидаги йирик корхоналар, ташкилотлар, компаниялар раҳбарлари иштирок этади.

Олдинроқ, асосий акциядорлар ва Россиянинг йирик компаниялари раҳбарлари Украинадаги вазиятни муҳокама қилиш учун Кремлга чақирилган эди. Маълумотларга кўра, учрашув пойтахтда Москва вақти билан 16:00 атрофида бўлиб ўтиши мумкин.

Шунингдек, Президент Путин томонидан видео алоқа орқали ўтказилиши мумкин бўлган учрашув турли соҳаларнинг бош директорларини ҳам бирлаштиради. Хусусан, «Яндекс» раҳбарияти Кремлда бўлиб ўтадиган учрашувга таклиф қилинган.

Маълумот ўрнида, 24 февраль куни эрталаб Путин Россияни «Украинани гаровга олганлар»дан ҳимоя қилиш учун махсус ҳарбий операция бошланганини эълон қилди. Украина Президенти Владимир Зеленский мамлакатда ҳарбий ҳолат эълон қилди ва Россия билан дипломатик муносабатларни узди.

Қайд этиш керакки, махсус операция бошланганидан сўнг Россия фонд бозори 2016 йилдан бери рекорд даражадаги паст даражага тушиб кетди, рубль тарихий минимал даражага етди: халқаро савдоларда евро 101,07 рублга, доллар 89,99 рублга кўтарилди.