Ўзбекистонда фуқароларга ва юридик шахсларга қишлоқ хўжалигига мўлжалланмаган ёки бўш турган ер участкаларни хусусийлаштириш орқали тадбиркорлик фаолияти, ерларни ижарага бериш, доимий фойдаланиш (эгалик қилиш), мерос қилиб қолдириш, умрбод эгалик қилиш ва шахсий мол-мулкларни хусусийлаштириш амалда қўллана бошлади. Бу ҳақда Иқтисодий тараққиёт ва камбағалликни қисқартириш вазирлиги маълум қилди.

Қайд этилишича, Вазирлар Маҳкамасининг тегишли қарорига мувофиқ ер участкаси ва унда жойлашган давлат мулки объекти (яъни бино-иншоотлар) билан бирга хусусийлаштирилганда мулк ҳуқуқини тасдиқловчи давлат ордери берилади.

Фуқаролар ва ташкилотлар эгалигидаги ерларни хусусийлаштириш мақсадида аризалар электрон ёки анъанавий шаклда Давлат хизматлари маркази ёки Ягона интерактив давлат хизматлари порталида қабул қилинади.

Муҳим омил — аризачи қонун бўйича хусусийлаштириш ҳуқуқига эгалиги, унинг ер участкаси хусусийлаштирилиши мумкин бўлган ерлар тоифасига кириши автоматик текширилиши йўлга қўйилган.

Аризачи томонидан хусусийлаштирилаётган ер участкаси учун тўлов қиймати тўлиқ амалга оширилгандан сўнг, Давлат активларини бошқариш агентлигидан мулк ҳуқуқи учун давлат ордери берилади.

Жисмоний ёки юридик шахс аукцион ғолиби деб эълон қилингач, аукционда белгиланган суммани тўлаганидан кейин унинг номига ер участкасига мулк ҳуқуқини берувчи давлат ордери ёки ижара шартномаси расмийлаштирилади ва давлат рўйхатидан ўтказилади.

Яна бир эътиборли жиҳат шундаки, ерга нисбатан мулк ҳуқуқи жорий этилиши сабабли, тижорат банклари ва нотариуслар фаолиятини тартибга солувчи ички ҳужжатларни ўзгартириш, улар учун ўқув-амалий семинарлар ташкил этиш белгиланган.

Хабарга кўра, республикада ноқишлоқ ерларни хусусийлаштириш ва ажратишнинг шаффоф, барча учун бир хил тартибнинг жорий этилиши, ер участкаларини сотишдан тушган маблағлардан оқилона фойдаланиш имкониятини таъминлаш ҳамда давлат ташкилотлари эгалигидаги ерлардан оқилона фойдаланиш ва келишув жараёнларини қисқартириш сингари имкониятлар лойида кўзланган асосий мақсадлардан биридир.

Аввалроқ ер участкаларини хусусийлаштириш бўйича давлат хизматларини кўрсатиш тартиби белгилангани хабар қилинганди.