Нефть нархлари 7 февраль кунги савдолар давомида ягона динамикасиз ўзгариб бормоқда: Brent фючерслари етти йиллик энг юқори кўрсаткични янгилаб, бир баррель учун 93 доллардан ошди, WTI фючерслари эса пасаймоқда.

Душанба куни Тошкент вақти билан соат 10:10 га қадар Лондоннинг ICE Futures биржасида Brent’нинг апрель фючерсларининг нархи бир баррель учун 93,49 долларни ташкил этди, бу аввалги сессиянинг ёпилиш нархидан 0,22 долларга (0,24 фоиз) юқори. 4 февраль кунги савдолар натижасида ушбу шартномалар бир баррель учун 2,16 долларга (2,4 фоиз) ошиб, 93,27 долларни ташкил қилди.

Нью-Йорк товар биржасининг (NYMEX) электрон савдоларида март ойидаги WTI нефти фючерслари нархи бу вақтга келиб бир баррель учун 92,03 долларни ташкил этди, бу 3 февраль кунги сессиянинг якуний қийматидан 0,28 долларга (0,3 фоизга) пастдир. 4 февраль куни ушбу шартномалар нархи 2,26 долларга (2,04 фоиз) ошиб, бир баррель учун 92,31 долларни ташкил қилди.

«Нефть бозори талабнинг тикланиши шароитида чекланган таклифнинг давом этиши ҳақидаги тахминлар билан қувватланмоқда», деб ёзади Trading Economics.

4 февраль кунги сессияда котировкалар биринчи марта геосиёсий хавфлар ва OPEK’нинг етарли миқдорда таъминот етказиб бера олиши, шунингдек, АҚШдаги совуқ об-ҳаво ҳақидаги хавотирлар давом этаётгани туфайли етти йиллик максимал даражага етди.

Шарқий Европадаги геосиёсий вазиятнинг ёмонлашуви JPMorgan таҳлилчиларини Brent нархи бир баррель учун 120 долларгача кўтарилиши сценарийсини башорат қилишга олиб келди.

Аввалроқ Saudi Aramco Осиё, АҚШ ва Европадаги қайта ишлаш корхоналари учун нефть нархини кўтариши ҳақида хабар берилганди.