Қорақалпоғистонда 555,5 млн долларлик 5 та лойиҳа бўйича ишлар охирига етказилмагани айтилди
Сенатда Қорақалпоғистонни ижтимоий-иқтисодий ривожлантириш ишларининг бориши кўриб чиқилди.
Қорақалпоғистонда 555,5 миллион долларга тенг 5 та лойиҳа бўйича ишлар охирига етказилмаган. Бу ҳақда Ўзбекистон Олий Мажлиси Сенати матбуот хизмати хабар берди.
Маълум қилинишича, Сенат ялпи мажлисда Қорақалпоғистонни комплекс ижтимоий-иқтисодий ривожлантириш бўйича белгиланган чора-тадбирлар ижро этилишининг бориши кўриб чиқилган.
Сенаторлар амалга оширилаётган ишлар натижасида аҳоли турмуш даражаси ошаётгани, янги иш ўринлари яратилаётгани, аҳоли даромадлари кўпаяётгани билан бирга айрим муаммоли масалалар мавжудлигини қайд этган. Хусусан, 2020–2023 йилларда Қорақалпоғистонни комплекс ижтимоий-иқтисодий ривожлантириш дастурига киритилган 124 та лойиҳани ишга тушириш муддатини узайтириш зарурати вужудга келган.
Шунингдек, Қораўзак туманида қиймати 3 миллиард сўм ва Қўнғирот туманида қиймати 5,5 миллиард сўм бўлган автомобилларга сиқилган газ қуйиш шохобчаларини ташкил этиш лойиҳаларига Энергетика вазирлиги томонидан рухсатнома тақдим этиш муддати кечиктирилмоқда.
Бундан ташқари, Қораўзак туманида вермикулит қазиб олишни кенгайтириш ва уни чуқур қайта ишлаш бўйича умумий қиймати 8,9 миллиард сўмга тенг 3 та лойиҳа бўйича Давлат геология ва минерал ресурслар қўмитасидан лицензия олиш учун ҳужжатлар тўлиқ расмийлаштирилмаган.
Шу билан бирга, ҳудудда амалга оширилаётган 555,5 миллион долларга тенг бўлган 5 та лойиҳа бўйича ишлар охирига етказилмаган. Яна 280,3 миллион доллар ҳажмидаги 13 та лойиҳа бўйича ишларни жадаллаштириш лозим. Таъкидланишича, «Жанубий Қорақалпоғистонда сув ресурсларини бошқаришни яхшилаш» лойиҳаси бўйича жорий йилда режалаштирилган 56,2 миллион долларга тенг кредит маблағларининг атиги 21,32 миллиони ўзлаштирилган.
Шунингдек, «Ўзбекистоннинг ғарбий қисмида ичимлик сув таъминоти тизимларини ривожлантириш» лойиҳаси бўйича Нукус, Беруний, Мўйноқ, Қўнғирот, Қораўзак ва Амударё туманларидаги сув иншоотларини қуриш ҳамда реконструкция қилиш учун жорий йилда ўзлаштирилиши режалаштирилган 21,9 миллион долларга тенг маблағнинг 1,7 миллиони ўзлаштирилган, холос.
Муҳокамалар якунида Сенатнинг мавжуд муаммоларни зудлик билан ҳал этиш, чора-тадбирлар ижроси устидан парламент назоратини кучайтириш назарда тутилган тегишли қарори қабул қилинган.
Аввалроқ Европа инвестицион банки Қорақалпоғистонга 35 миллион евро ажратиши мумкинлиги хабар қилинганди.
