Қозоғистон 2027 йилга бориб нефть қазиб олиш ҳажмини қарийб 100 млн тоннага етказади
Қозоғистон иқтисодиёт вазири Алибек Қуантиров айтишича, ЯИМнинг реал ўсиши 2023 йилдаги 4 фоиздан 2027 йилда 4,2 фоизгача тезлашиши кутилмоқда. 2023 йилда нефт қазиб олиш 92,6 миллион тоннани ташкил этади, 2027 йилда эса 99,9 миллион тоннага етади. Экспорт 80,9 миллиард доллардан 84,6 миллиард долларга ошади
Қозоғистон Миллий иқтисодиёт вазири Алибек Қуантиров 2023-2027 йилларга мўлжалланган мамлакатни ижтимоий-иқтисодий ривожлантириш прогнозини маълум қилди. Бу ҳақда Kazinform хабар берди.
«Прогноз 2021 йилда иқтисодий ўсиш бўйича якуний маълумотлар, халқаро молия ташкилотларининг жаҳон иқтисодиёти ўсиши бўйича тахминлари ва экспорт товарлари нархларини ҳисобга олган ҳолда шакллантирилди. Халқаро молия ташкилотларининг консенсус прогнозларига кўра, 2022 йилда 1 баррел нефтнинг жаҳон нархи 104,2 долларга етиши кутилмоқда. 2023 йилда жаҳон иқтисодиётининг ўсиши 3 фоизни ташкил этади», — деди Алибек Қуантиров.
Унга кўра, прогноз ва бюджет параметрларини шакллантиришда асосий стсенарий асос қилиб олинган. У нефт нархини 85 доллар/баррел деб тахмин қилмоқда. ЯИМнинг ўртача йиллик реал ўсиши 3,9 фоизни ташкил этади.
Инфляция 2023 йилда 7,5-9,5 фоиз, 2024 йилда 4-5 фоиз, 2025-2027 йилларда 3-4 фоиз даражасида белгиланади.
«ЯИМнинг реал ўсиши 2023 йилдаги 4 фоиздан 2027 йилда 4,2 фоизгача тезлашиши кутилмоқда. Номинал ЯИМ 120,7 триллион тенгедан 176,6 триллион тенгегача ўсади. 2023 йилда нефт қазиб олиш 92,6 миллион тоннани ташкил этади, 2027 йилда эса 99,9 миллион тоннага ошади. Миллий банк прогнозларига кўра, экспорт 80,9 миллиард доллардан 84,6 миллиард долларга, импорт 45,7 миллиард доллардан 53,5 миллиард долларгача ошади», — дея қўшимча қилди вазир.
