Олмаотага авиақатновларни бекор қилган Uzbekistan Airways

Uzbekistan Airways авиакомпанияси Қозоғистоннинг бир қатор шаҳарларига парвозларни тўхтатди.

Маълум қилинишича, 2022 йил 8 январдан 13 январгача режалаштирилган HY761/762/763/764 Тошкент–Олмаота–Тошкент, HY767/768 Самарқанд–Олмаота–Самарқанд, HY9729/9730 Нукус–Оқтўбе–Нукус, HY9725/9726 Урганч–Оқтов–Урганч, HY9727/9728 Нукус–Оқтов–Нукус йўналишлари бўйича авиақатновлари етиб борадиган аэропортларнинг техник сабабларига кўра бекор қилинган.

Қайд этилишича, Олмаота, Оқтўбе ва Оқтовга бекор бўлган парвозлар йўловчилари авиачипталарининг тўлиқ қийматини чипта сотиб олинган жойда қайтариб олиш ёки бошқа санага бепул қайта бронлаш ҳуқуқига эгадир.

Қозоғистон бизнесига етказилган зарар

Қозоғистонда ноқонуний хатти-ҳаракатлар ва сўнгги воқеалар туфайли бизнесга етказилган дастлабки зарар 40 миллиард тенге (91,8 миллион доллар)га баҳоланмоқда.

Маълум қилинишича, тадбиркорлар палатаси бизнес бирлашмалари билан биргаликда кўрилган зарарнинг тахминий миқдори тўғрисида маълумот тўпламоқда. Маълумотларга кўра, 43 та объектда, жумладан, 12 та савдо-кўнгилочар маркази ва савдо уйларида жойлашган 300 тага яқин тадбиркорлик субъектлари аниқланган.

Қайд этилишича, зарарнинг катта қисми савдо, умумий овқатланиш, транспорт, хизмат кўрсатиш соҳалари, шунингдек, молия сектори субъектларига, хусусан, банкоматларга етказилган. Бундан ташқари, Олмаотада олтита қурол-яроғ дўкони талон-тарож қилингани ҳақида хабар берилган.

«Зарарнинг умумий миқдори тахминан 40 миллиард тенгени ташкил этмоқда. Аммо, ҳозирча зарарнинг ҳаммасини ҳисоблашнинг имкони йўқ, чунки кўпчилик ижарачиларнинг объектларидан хабар олишнинг имкони йўқ», — дея қўшимча қилган ташкилот.

Зарарнинг моддий хусусияти, асосан, бинолар олд қисмлари, кириш жойлари, иморатларнинг шикастланиши, шунингдек, қимматбаҳо техникалар, жиҳозлар, ички буюмлар, товар захиралари ва бошқаларни ўғирлашнинг кўплаб ҳолатларидан иборат.

Судга шикоят қилган Nike

АҚШнинг спорт товарлари ишлаб чиқарувчиси Nike рақобатчиси Lululemon компанияси устидан Mirror уй фитнес ускуналари ва дастурий таъминотини ишлаб чиқариш билан боғлиқ патент ҳуқуқларини бузганлик учун судга мурожаат қилди.

Nike компаниясининг таъкидлашича, Mirror Home Gym компания ихтиро қилган ва патентлаган технологиядан, жумладан, Нью-Йорк округ судига берилган даъвога кўра, фойдаланувчиларни жисмоний машқлар қилишга ундайдиган, юрак уриш тезлигини кузатувчи ва фаоллик маълумотларини тўплайдиган қурилмадан фойдаланмоқда.

Даъвода, шунингдек, Nike компанияси Lululemon’га 3 ноябрь куни хабар бериб, Nike даъволари Mirror қурилмалари ва иловаларида қўлланиладиган патентлар рўйхатини тақдим этган.

Lululemon’нинг адвокати хабарномага жавоб бериб, компания патент ҳуқуқларини бузаётганига ишонмаслигини айтди.

«Биз ўз позициямизга ишонамиз ва судда ўзимизни ҳимоя қилиш имкониятини кутмоқдамиз», деди Lululemon вакили.

Lululemon, шунингдек, Peloton Interactive Inc билан суд ишларини олиб бормоқда: спорт кийимлари ишлаб чиқарувчиси Peloton’ни Lululemon’нинг спорт кийимлари дизайнини нусхалашда айблайди.

Туристик зоналар барпо этиш учун 1 млрд доллар

Тошкент вилоятида туризм салоҳиятини янги босқичга олиб чиқиш бўйича алоҳида дастур ишлаб чиқилади.

Мамлакатнинг 2022–2026 йилларга мўлжалланган тараққиёт стратегиясини 2022 йилда амалга ошириш бўйича «йўл харитаси» лойиҳасига кўра, Амирсой ва Чимён туристик мажмуаларида, Чорвоқ сув омбори ва «Тошкент денгизи» атрофида, Оҳангарон, Ангрендаги тоғли ҳудудларда қўшимча туристик зоналар ва дам олиш масканлари барпо этилишига 1 миллиард доллар инвестициялар жалб этилади ва 80 минг иш ўринлари яратилади.

Шунингдек, Ангрен, Бўстонлиқ, Паркент, Оҳангаронда камида 100 гектардан қир-адир ерлари дам олиш масканлари, дала ҳовлилари ва якка тартибдаги уй-жойлар қуриш учун очиқ аукционга чиқарилади.