Биткоин 2022 йил бошида 12 фоизга, бошқа етакчи рақамли валюталар эса 22 фоизгача арзонлашди, деб ёзади «Коммерсантъ».

Қайд этилишича, криптовалюталар қийматининг кескин пасайиши Қозоғистондаги вазият, шунингдек, Федерал резерв тизими пул-кредит сиёсатининг кескинлашуви билан боғлиқ. Биткоин 2021 йил сентябрь ойи охиридан бери энг паст қийматига етди ва 8 январь куни 40,5 минг долларни ташкил қилди. 9 январда валюта қиймати 41,5 минг долларгача ошганига қарамай, унинг капиталлашуви бозорнинг 40 фоизидан камини ташкил этди.

Эфириум ҳам 18 фоизга тушиб, 2021 йил 1 октябрдан бери энг паст даражага тушди. Унинг нархи 3 минг долларни ташкил қилади. Binance Coin, Solana, Cardano каби криптовалюталар минтақада 14 фоиздан 22 фоизгача пасайиш қайд этди. 

Нашрнинг қайд этишича, Қозоғистондаги норозилик намойишлари криптовалюта бозорига кучли таъсир кўрсатган, чунки бу мамлакатда дунёдаги майнинг қувватининг 18 фоизи мавжуд. Қозоғистон майнинг қуввати бўйича дунёда АҚШдан кейин иккинчи ўринда туради. Мутахассисларнинг фикрича, Қозоғистонда тартиб ўрнатилиб, вазият барқарорлашганидан сўнг, агар ҳукумат муносабатини ўзгартирмаса, майнинг саноати ўзининг одатий йўналишига қайтади.

«Бироқ криптовалюталар қийматининг пасайиши ортидаги асосий омил ФРС пул-кредит сиёсатининг қаттиқлашуви ҳисобланади», — дейди EXANTE етакчи стратеги Жанис Кивкулис.

Экспертларнинг фикрича, котировкаларнинг пасайиши яна бир неча ҳафта давом этади. Кивкулиснинг биткоин нархи 38 минг долларгача тушишига ишончи комил.

Маълумот ўрнида, 2 январь куни Қозоғистон ғарбидаги Жанаўзен шаҳрида суюлтирилган газ нархи икки баравар ошишига қарши митинглар бошланди. Намойишлар тезда бутун мамлакат бўйлаб тарқалиб, сиёсий тус олди, аммо кейин тартибсизликлар, хавфсизлик ходимлари билан тўқнашувлар ва талончиликка айланиб кетди.

Аввалроқ Goldman Sachs инвестициялар банки биткоин нархи 100 минг доллардан ўтиб кетишини прогноз қилганди.