Хорижий сармоя учун очиқ эшиклар сиёсати Қозоғистоннинг асосий стратегияси бўлиб қолади. Бу ҳақда республика президенти Қосим-Жўмарт Тўқаев маълум қилди.

Тўқаев ўзининг Twitter’даги саҳифасида инглиз тилида бир нечта хабарларни жойлаштирди. Президент унда Қозоғистондаги сўнгги воқеалар ҳақида қисқача тўхталиб ўтди.

«Тўғридан-тўғри хорижий инвестициялар учун очиқ эшиклар сиёсати Қозоғистоннинг асосий стратегияси бўлиб қолади», — дея хулоса қилди Тўқаев.

Бундан ташқари, у Қозоғистон бундан кейин ҳам хорижий дипломатик ваколатхоналар, шунингдек, хорижий компаниялар ва инвесторларнинг ходимлари, мулклари, хавфсизлиги ҳамда ҳимоясини таъминлашда давом этишига ишонтирди.

Эслатиб ўтамиз, 2 январь куни Жанаўзенда суюлтирилган газ нархи ошишига қарши намойишлар бошланди. Намойишлар тезда бутун мамлакат бўйлаб тарқалди, норозилар сиёсий талабларни айтишни бошлади. Аммо кейин намойишлар хавфсизлик кучлари билан тўқнашувлар, маъмурий бинолар, банклар ва дўконларга ҳужумлар, талончилик ва ўт қўйишга айланди.

Аввалроқ Қозоғистон бизнесининг тартибсизликлар туфайли кўрган зарари қарийб 87,2 миллиард тенгени (тахминан 198 миллион доллар) ташкил этгани маълум қилинганди.