Қозоғистон Президенти тартибсизликлардан кўрилган тахминий зарарни маълум қилди
Тўқаевнинг Европа кенгаши Президенти билан онлайн учрашуви бўлиб ўтган.
Қозоғистондаги тартибсизликлардан кўрилган иқтисодий зарар 2-3 миллиард долларни ташкил қилиши мумкин. Бу ҳақда мамлакат Президенти Қосим-Жўмарт Тўқаев маълум қилди.
Президент матбуот хизматининг хабар беришича, Қосим-Жўмарт Тўқаев 10 январь куни Европа кенгаши Президенти Шарл Мишел билан видеоконференция орқали бўлиб ўтган музокаралар чоғида иқтисодий зарар ҳақида гапирган. Учрашув Европа томонининг ташаббуси билан бўлиб ўтган.
Қозоғистон Президентининг сўзларига кўра, «террорчиларнинг зўравонликлари оқибатида ҳуқуқ-тартибот идоралари ходимлари ва тинч аҳоли орасида кўплаб қурбонлар бўлган». Бундан ташқари, 1300 га яқин корхона зарар кўрган, 100 дан ортиқ савдо марказлари ва банкларга ҳужум қилинган, 500 га яқин полиция машинаси ёқиб юборилган.
Давлат раҳбари мамлакатдаги воқеаларни террорчилик ҳаракати, шунингдек, Қозоғистонга қарши яхши ташкил этилган босқинчилик ҳаракати деб атаган. Жаноб Тўқаевнинг ишонтириб айтишича, ҳужумни тайёрлашда асосан Марказий Осиё давлатлари, шунингдек, Афғонистон ва Яқин Шарқдан келган хорижий жангчилар иштирок этган.
Аввалроқ Қозоғистон бизнесининг тартибсизликлар туфайли кўрган зарари қарийб 87,2 миллиард тенгени (тахминан 198 миллион доллар) ташкил этгани хабар қилинганди.