Қозоғистон Россия орқали Украинага кўмир етказиб беришда айрим чекловлар борлигини тан олди
Москва Қозоғистондан Украинага кетаётган кўмир транзитини тўхтатгани маълум бўлганди
Қозоғистон Саноат ва инфратузилмани ривожлантириш вазирлиги Россия томонидан Қозоғистондан Украинага кўмир транзитини тўлиқ тўсиб қўйгани ҳақидаги маълумотни тасдиқламади, бироқ айрим чекловларни тан олди. Бу ҳақда ТАССга вазирлик матбуот котиби Мадияр Уакпаев маълум қилди.
Унинг таъкидлашича, Россия томонидаги инфратузилманинг иш юки туфайли айрим чекловлар мавжуд.
«Россия кўмир етказиб беришни тўлиқ тўсиб қўйгани йўқ, бироқ Россия томонидаги инфратузилманинг иш юки туфайли айрим чекловлар мавжуд», — дея жавоб берди Уакпаев Қозоғистон кўмирининг Украинага етказиб берилиши ҳақидаги саволга.
Украина Олий Радасининг энергетика ва уй-жой коммунал хўжалиги қўмитаси раҳбари Андрей Герус Москва Қозоғистондан Украинага кетаётган кўмир транзитини тўхтатганини маълум қилганди. Бундан олдин Герус Россиядан кўмир етказиб бериш тўхтатилиши ҳақида ҳам хабар берган эди.
Аввалроқ Ўзбекистон бензин импорт қилаётган давлатлар орасида Россия етакчи экани маълум бўлганди.