Қозоғистонда юз бераётган тартибсизликлар фонида уран нархи 9 фоизга қимматлашди. Бу ҳақда Bloomberg хабар берди.

Маълум қилинишича, уран COMEX биржасида 9,26 фоизга, бир фунти учун 46 долларгача қимматлашган. Нарх жаҳон уранининг 40 фоизидан ортиғини ишлаб чиқарадиган Қозоғистондаги сўнгги воқеалар туфайли кўтарилмоқда.

«Қозоғистон дунёдаги биринчи рақамли уран етказиб берувчиси, буни Саудия Арабистонида нефть билан боғлиқ муаммолар юзага келиши билан солиштириш мумкин», — деган UxC LLC ядро ёқилғиси бозорини ўрганиш ва таҳлил қилиш компанияси президенти Жонатан Хинзе.

Унга кўра, уран танқислиги эҳтимоли ҳақиқатда бозорда танқислик бўлмаса ҳам, ҳозирда инвесторларнинг кайфиятини белгилайдиган омилдир.

Қайд этилишича, 6 январь куни Лондон фонд биржасида табиий уран қазиб олувчи «Казатомпром» давлат компаниясининг глобал депозит квитанциялари тушиб кетган. Маълумотларга кўра, компания акциялари 4,5 фоизга тушиб, ҳар бир акция учун 35,83 долларни ташкил қилган.

Маълумот ўрнида, 2 январь куни Қозоғистонда норозилик намойишлари бошланган, сўнгра оммавий тартибсизликлар ва намойишчиларнинг хавфсизлик кучлари билан тўқнашувларга айланган. Бўлаётган воқеалар фонида мамлакат ҳукумати истеъфога чиққан. Қозоғистонда фавқулодда ҳолат эълон қилинган.

Қозоғистон президенти Қосим-Жомарт Тўқаев 5 январь куни Коллектив Хавфсизлик Шартномаси Ташкилоти давлатлари раҳбарларига ёрдам сўраб мурожаат йўллади. Бунга жавобан КХШТ Қозоғистонга коллектив тинчликпарвар кучларини юборишга қарор қилди.

Аввалроқ Қозоғистонда барча банклар фаолияти тўхтатилгани хабар қилинганди. Шунингдек, Қозоғистон Хитойдан келаётган криптомайнерлар туфайли АЭС қуриши мумкинлиги ҳақида хабар берилди.