Reebok ўзининг биринчи «ақлли» соатини ишлаб чиқарди
Қурилмани Amazon онлайн дўкони орқали харид қилиш мумкин.
Reebok компанияси ўзининг биринчи «ақлли» соатини ишлаб чиқарди. Бу ҳақда Gizmochina хабар берди.
Маълум қилинишича, Reebok компанияси Ҳиндистон бозорида 60 долларлик биринчи ActiveFit 1.0 ақлли соатини сотувга чиқарган. Қурилмани ҳозирча фақат Amazon онлайн дўкони орқали харид қилиш мумкин.
Соат тўртта ранг вариантида мавжуд — қора, кўк, тўқ кўк ва қизил. Соат бир қувватланишда 15 кунгача, кутиш режимида эса 30 кунгача ишлашга қодир.
ActiveFit 1.0 соати 1,3 дюймли (3,3 сантиметр) HD дисплейга эга бўлиб, думалоқ циферблат ичига жойлаштирилган ва IP67 классли сув ва чангга қарши ҳимояга эга. Соат ижтимоий тармоқлар, қўнғироқлар ва хабарлар ҳақида билдиришномаларни юбориши, шунингдек, камера ва мусиқани бошқариши мумкин. Бундан ташқари, унда ўрнатилган ўйинлар мавжуд.
Шунингдек, ақлли соат қондаги кислород даражасини ўлчаши ва юрак уриши тезлиги ва қон босимидаги ўзгаришларни кечаю кундуз қайд этиши мумкин. Соат, шунингдек, фойдаланувчининг уйқусини кузатиши ва ҳаракатсиз қолганда бадантарбия билан шуғулланиш ҳақида эслатмалар юбориши мумкин. Ҳаммаси бўлиб, соат спорт ва бошқа фитнес билан боғлиқ машғулотлар учун 15 та режимга эга.
Ақлли соатда менструал цикли ва медитацион нафас олиш функцияси, шунингдек, калория ва қадам трекерлари мавжуд.
Reebok ActiveFit 1.0 ақлли соатининг нархи 60 долларлиги ҳисобга олинса, у Xiaomi, Amazfit, Realme, Noise ва бошқа брендлар таклифларига яхши рақобатчи бўлади.
Аввалроқ Reebok, ZARA ва Adidas каби бренд эгалари Ўзбекистонга таклиф этилиши хабар қилинганди. Шунингдек, Masonite компанияси илк «ақлли» эшикни намойиш этиши ҳақида хабар берилди.