Телефон ва бошқа қурилмаларни синовдан ўтказиш билан шуғулланувчи Хитойнинг AnTuTu хизмати Apple маҳсулотлари бўйича ўз ҳисобитини эълон қилди. Бу ҳақда компания сайтида хабар берилган.

Қайд этилишича, AnTuTu бенчмарки вакиллари бешинчи авлод iPad Pro’ни Apple компаниясининг энг кучли мобил қурилмаси, деб топган.

Ноябрь ойидаги ўтказилган тест натижаларига кўра, M1 чипли, 8 гигабайт оператив хотира ва 256 гигабайт ички хотира, шунингдек, 12,9 дюймли дисплейга эга бешинчи авлод iPad Pro Apple компаниясининг энг кучли мобил қурилмаси бўлган. Қурилма 1,2 миллион балл тўплаган. Энг юқори 3 та ўринни планшетлар эгаллаган — 11 дюймли бешинчи авлод iPad Pro ва 12,9 дюймли учинчи авлод iPad Pro.

iPhone 13 Pro Max флагмани эса энг кучли смартфон, деб топилган. У A15 Bionic чип, 6 гигабайт оператив хотира ва 1 терабайт ички хотирага эга. Смартфон 842 минг балл олган ва умумий рейтингдан тўртинчи ўринни эгаллаган.

AnTuTu вакиллари биринчи икки ўринни эгаллаган планшетлар M1 процессорига асосланганини қайд этган. Топ-10ликдаги энг оммабоп чип эса A15 Bionic бўлиб, у рейтингдаги тўртта қурилмага ўрнатилган. Муаллифларнинг фикрича, декабрь ойида ушбу рейтингда ҳеч қандай ўзгариш бўлмайди, чунки Apple 2021 йил ҳисобига кўра бошқа янги маҳсулот ишлаб чиқармайди.

Декабрь ойи бошида AnTuTu вакиллари Xiaomi Black Shark 4S Pro’ни энг кучли Android смартфон деб топганди.

Аввалроқ 2021 йил сентябрь ва октябрь ойларида Apple Хитойда юзага келган етказиб бериш занжири муаммолари ва электр таъминотидаги чекловлар туфайли iPhone 13’ни режалаштирилганидан 20 фоиз камроқ ишлаб чиқаргани хабар қилинганди.