Renault, Nissan ва Mitsubishi компаниялари қўшма электромобиль ишлаб чиқаришга сармояларни уч баробар оширишни режалаштирмоқда. Бу ҳақда Reuters хабар берди.

Франция-Япония иттифоқи янги рақобатчиларнинг босимига ва талабнинг электр транспорт воситаларига ўзгаришига дуч келгани сабабли ҳамкорликни чуқурлаштиришга интилмоқда. 2025 йилга бориб компаниялар ихчам электромобилларни бензинли автомобиллар каби арзонга чиқаришни мақсад қилган.

Хабарга кўра, 27 январь куни ҳар учала автомобиль ишлаб чиқарувчиси келаси беш йил ичида электромобиль ишлаб чиқаришга 23 миллиард доллар сармоя киритиш режаларини эълон қилиши кутилмоқда. 2030 йилгача қўшма корхона 30 дан ортиқ янги аккумуляторли электр транспорт воситаларини жорий қилиши керак. Компаниялар аллақачон ўз маҳсулотларини электрлаштириш учун 11,3 миллиард доллар сарфлаган.

Nissan матбуот котиби изоҳ беришдан бош тортган. Renault ва Mitsubishi ҳам сўровга жавоб бермаган.

Альянс аллақачон электромобиллар учун тўртта платформани ишлаб чиққан. Улардан бири асосида Nissan’дан Ariya ва Renault’дан Megane моделлари ишлаб чиқилган. Яна бошқа платформа асосида Nissan, унинг хитойлик ҳамкори Dongfeng ва Renault компанияларининг Dacia бренди электромобиллари ишлайди.

Қолган иккита платформа эса Японияда «кей-кар» деб аталадиган шаҳар автомобиллари ва енгил тижорат автомобиллари учун платформалардир.

Таъкидланишича, ўн йилликнинг ўрталарига келиб, компаниялар Renault томонидан ишлаб чиқилган бешинчи ихчам электромобиль платформасини ишга туширмоқчи.

Шунингдек, альянс Франция, Буюк Британия, Хитой ва Японияда 2030 йилгача жами 220 гигаватт/соат аккумулятор қуввати ишлаб чиқариш қувватига биргаликда сармоя киритишни режалаштирмоқда.

Аввалроқ Lamborghini электромобиль ишлаб чиқаришга ўтиш учун рекорд сумма ажратгани хабар қилинганди. Шунингдек, Ўзбекистонда электромобиль ишлаб чиқариш рағбатлантирилиши ҳақида хабар берилди.