Renault’нинг Россиядаги активлари давлат мулкига айланади
Renault’нинг Россиядаги активларининг қиймати 2021 йил декабрь ҳолатига кўра, 2,195 миллиард еврони ташкил қилади.
Франциянинг Renault автомобиль ишлаб чиқарувчисининг Россиядаги активлари давлат мулкига айланади. Бу ҳақда Саноат ва савдо вазирлигининг Telegram’даги расмий каналидаги хабарда айтилади.
Битимлар натижасида Renault Russia ЁАЖ акцияларининг 100 фоизи Москвага ўтказилади, «Автоваз»нинг 67,69 фоизи НАМИга, автомобиль ишлаб чиқарувчининг қолган акциялари эса «Ростех»га тегишли бўлади. Иккала транзакция ҳам ФАС томонидан тасдиқланди.
«Шу билан бирга, Renault ‘Автоваз’даги ўз улушини қайтариб сотиб олиш имкониятига эга бўлади, бу кейинги олти йил ичида амалга оширилиши мумкин», дейилади Саноат ва савдо вазирлиги баёнотида.
Хабарда айтилишича, «Автоваз» Lada автомобилларини ишлаб чиқаришни давом эттиради ва Россия бозорида Renault автомобилларига хизмат кўрсатади.
Renault Group бош директори Лука де Мео сотиш қарорини «қийин, аммо зарур» деб атади.
«Биз Россиядаги 45 минг нафар ходимимиз учун масъулиятли танловларни амалга оширмоқдамиз, шу билан бирга гуруҳ самарадорлигини ва келажакда турли шароитларда мамлакатга қайтиш имконини сақлаб қоламиз», — деди у.
Renault’нинг Россиядаги активларининг қиймати 2021 йил декабрь ҳолатига кўра, 2,195 миллиард еврони ташкил қилади.