Германия Иқтисодиёт вазири Роберт Хабекнинг айтишича, мамлакат ҳали ҳам Россия кўмир, нефть ва газига шошилинч эмбарго қўя олмайди. Бу ҳақда вазир Германия Бундерстагидаги нутқи давомида маълум қилди.

Бироқ, Германия аллақачон Россия хом ашёсидан воз кечиш учун илк қадамларни қўйган.

«Ҳа, биз ҳали ҳам Россиядан кўмир, нефть ва газга зудлик билан эмбарго қўйиш имкониятига эга эмасмиз. Буни тан олиш керак ва буни тан олиш жуда аччиқ. Лекин биз буни ҳали қила олмаганимиз, биз ҳеч нарса қилмаётганимизни англатмайди. Биз босқичма-босқич кўмир, нефть ва газни стратегик жиҳатдан камайтирмоқдамиз», — деди Роберт Хабек парламентда сўзлаган нутқида.

Бундан олдин Европа Иттифоқи дипломатияси раҳбари Жозеп Боррел ЕИнинг 27 давлати ташқи ишлар вазирлари Россиядан нефть импорт қилишдан бош тортиш имкониятини муҳокама қилишини айтганди. Ундан аввал эса Европа комиссияси май ойининг ўрталарида тайёр бўладиган Россия гази, нефти ва кўмиридан воз кечиш режасини таклиф қилган эди.

Унинг сўзларига кўра, ЕИ 2027 йилгача Россия хом ашёсидан воз кечишни режалаштирмоқда. АҚШ 8 март куни Россия энергия ташувчиларга эмбарго жорий қилди. Буюк Британия, шунингдек, 2022 йил охиригача Россия нефтидан воз кечишини эълон қилди.

Аввалроқ Германия ва Қатар газ бўйича узоқ муддатли ҳамкорликка келишиб олгани хабар қилинганди. Шунингдек, Германия йил охиригача Россия нефтидан деярли мустақил бўлмоқчилиги ҳақида хабар берилди.