Россия Марказий банки санкциялар остида қолган банкларни қўллаб-қувватлаш чораларини кўради. Бу ҳақда банк матбуот хизмати хабар берди.

Маълум қилинишича, қўллаб-қувватлаш АҚШнинг блокловчи санкциялари жорий этилган банклар — «ВТБ», «Совcомбанк», «Новикомбанк», «Откритие»; «Промсвязьбанк» ва «Россия» банки (Европа Иттифоқи ва АҚШ санкциялари остида); Марказий банкнинг хабарида кўрсатилган «Сбербанк» (корреспондентлик ҳисобларига нисбатан санкциялар остида)га кўрсатилади.

«Банкларнинг рублдаги барча операциялари амалга оширилади ва барча мижозларга одатдагидек тегишли хизматлар кўрсатилади. Хорижий валютадаги барча мижозлар маблағлари ҳам сақланади ва ҳисоб валютасида ечиб олиниши мумкин. Марказий банк банкларни рубль ва хорижий валютадаги маблағлар билан қўллаб-қувватлашга тайёр», дейилади хабарда.

Регулятор матбуот хизматининг аниқлик киритишича, банклар юқори барқарорлик захирасини сақлаб қолган ва Россия иқтисодиётини кредитлашда бизнесни ривожлантириш учун муҳим салоҳиятга эга. Ҳар бир банк балансининг катта қисми (80 фоизидан ортиқ) рублда ифодаланган. Хорижий валютадаги кредитлар асосан кредитга лаёқатли Россия корхоналарига берилади, улар валютада хизмат қилишда давом этади.

«Россия банки банклар фаолиятининг барқарорлиги ва узлуксизлигини таъминлаш, уларнинг кредиторлари ва омонатчилари манфаатларини ҳимоя қилиш бўйича қўшимча чоралар кўришга тайёр», дейилади Марказий банк хабарида.

Ғарб давлатлари Россиянинг давлат қарзи, давлат тараққиёт корпорацияси ва «Промсвязбанк», «Сбербанк» ва «ВТБ»га нисбатан санкциялар киритди, бу эса уларни АҚШ молия тизими ва доллар операцияларидан узиб қўяди.

АҚШ Россиянинг икки йирик банки — «Сбербанк» ва «ВТБ»га қарши санкциялар жорий этди. Америка банклари 26 мартгача «Сбербанк» ва унинг шўба корхоналарининг вакиллик ҳисобларини ёпиши шарт ва шу кундан бошлаб уларга «Сбербанк» иштирокидаги операцияларни амалга оширишга рухсат берилмайди.

ВТБ блокловчи санкциялар остида қолди — унинг АҚШдаги активлари музлатиб қўйилмоқда, «Откритие», «Новикомбанк» ва «Совcомбанк»га қарши ҳам блокловчи санкциялар жорий этилмоқда. Шунингдек, «Газпромбанк», «Россельхозбанк», «Альфа-банк», Москва кредит банки учун капитал жалб қилиш бўйича чекловлар жорий этилмоқда.

Бундан ташқари, «Альфа-банк» вақтинчалик янги еврооблигациялар чиқара олмайди ёки акция жойлаштира олмайди. Лекин бу чекловлар, аслида, нодавлат компаниясига тааллуқли эмас, балки банк одатдагидек ишлайди. «Газпромбанк»нинг таъкидлашича, санкциялар блокловчи эмас ва банк фаолиятига таъсир қилмайди.

«Сбербанк»нинг аниқлик киритишича, унинг барча тизимлари ва идоралари АҚШ санкциялар рўйхатига киритилганидан кейин одатдагидек ишламоқда, пластик карталар билан операциялар эса тўлиқ ҳажмда амалга оширилмоқда. Таъкидланишича, киритилган чекловлар мижозлар маблағларининг хавфсизлиги ва мавжудлигига таъсир қилмайди.

Қайд этиш керакки, ғарб санкциялари Донецк ва Луганск мустақиллигининг тан олиниши ва Россиянинг Украинадаги ҳарбий операциясининг бошланиши билан боғлиқ. 24 февраль куни эрталаб Президент Владимир Путин Москва Донбассда махсус операция бошлагани ва Украинани «қуролсизлантириш ва нацистлардан тозалаш»га интилишини маълум қилди. Украина Президенти Владимир Зеленский мамлакатда ҳарбий ҳолат эълон қилди ва Москва билан дипломатик алоқаларни узди.

Аввалроқ Apple Россия банкларининг иловаларини блоклашни бошлагани хабар қилинганди. Шунингдек, нима учун Россияга қарши санкциялар иш бермаслиги ҳақида хабар берилди.