Россия санкцияга учраган компаниялар ва юридик шахслар сони бўйича Эронни ортда қолдирди. Бу ҳақда Bloomberg хабар берди.

Маълум қилинишича, Россия сўнгги кунларда Ғарб давлатлари томонидан қабул қилинган чеклов чоралари тўлқинидан сўнг санкциялар остидаги шахслар сони бўйича Эронни ортда қолдириб, дунё етакчисига айланди.

Castellum.ai санкциялар маълумотлар базаси маълумотларига кўра, 22 февралдан буён Россия юридик ва жисмоний шахсларига нисбатан 2778 та янги чеклов жорий этилган бўлиб, уларнинг умумий сони 5530 тага етган.

Бу кўрсаткич асосан ядро дастури ва терроризмни қўллаб-қувватлашгани учун чекловларга учраган Эрон (3616), Сурия (тахминан 2600) ва Шимолий Корея (тахминан 2100)дан кўпроқдир.

Қайд этилишича, 22 февралдан бери Россияга қарши санкцияларнинг катта қисми жисмоний шахсларга нисбатан жорий қилинган (2427 та). Юридик шахсларга нисбатан 343 та чеклов белгиланган. Швейцария (568), ЕИ (518), Франция (512) ва АҚШ (243) Россияга қарши санкцияларни энг фаол киритган.

«Бу молиявий ядро уруши ва тарихдаги энг катта санкция ҳодисасидир. Икки ҳафтадан камроқ вақт ичида Россия глобал иқтисодиётнинг бир қисмидан глобал санкциялар ва молиявий яккалашнинг энг катта нишонига айланди», — Обама ва Трамп маъмуриятидаги собиқ ғазначилик ходими, Castellum.ai асосчиларидан бири Питер Пятецкий.

X-Compliance ахборот тизимининг санкциялар йўналиши бўйича таҳлилчиси Уляна Поповага кўра, Эронга қарши санкциялар сўнгги 40 йил ичида аста-секин тўлқинларда, Россияга қарши эса бир лаҳзада жорий этилди.

АҚШ Эрондан нефть етказиб беришни, у ерда хорижий компанияларнинг фаолиятини тақиқлайди, Эрон иқтисодиётининг молиявий секторига тўлиқ чекловлар қўйилган. Буни ҳисобга олганда, умуман, Эронга нисбатан чекловлар режими Россияга нисбатан анча кенгроқдир.

«Шуни ҳам ҳисобга олиш керакки, Эрон иқтисодиёти Россияникидан 4 баравар кичик ва Россия Федерацияси ҳозиргача бундай кенг кўламли санкцияларга дучор бўлган энг йирик иқтисодиётдир», — дея қўшимча қилади Попова.

X-Compliance маълумотларига кўра, 40 дан ортиқ давлат Россияга қарши турли иқтисодий чораларни жорий қилган. 7000 дан ортиқ Россия фуқаролари санкциялар хавфи остида («50 фоиз қоидаси» ҳисобга олинган ҳолда). Шундан 2500 дан ортиғи жисмоний шахслар ва 4500 дан ортиқ компаниялардан иборат.

Аввалроқ Европа Иттифоқи Россияга қарши янги санкциялар пакетини тайёрлагани хабар қилинганди. Шунингдек, S&P Россиянинг 52 та компанияси рейтингини «дефолт олди» даражасига туширгани ҳақида хабар берилди.