Россия ва Украина ўртасидаги кескинлик фонида биткоин нархи 41 минг доллардан пастга тушди. Бу ҳақда «Интерфакс» хабар берди.

Маълум қилинишича, 18 февраль кунги савдоларда Россия ва Украина ўртасидаги зиддиятнинг яна кучайиши ва АҚШ Федерал захира тизими томонидан пул-кредит сиёсатининг кескинлаштириши кутилаётгани сабабли биткоин нархи 41 минг доллардан пастга тушган.

Биткоин котировкаси бир кун олдинги савдо сессияси ёпилганидан бери 0,7 фоизга тушиб кетган ва 40 минг 422 долларни ташкил этган. Жами 2022 йил бошидан бери криптовалюта нархи тахминан 12 фоизини йўқотган.

Иккинчи энг оммабоп криптовалюта бўлган Ethereum нархи 0,11 фоизга пасайиб, 2893 долларни ташкил этмоқда. 2022 йил эфир 21,5 фоизга арзонлашган.

«Уолл-стрит хавф-хатарни ўчириш режимига ўтди ва биткоин бунинг учун тўлайди. Геосиёсий вазият ва марказий банк сиёсатининг потенциал кескинлашиши ҳақидаги хавотир криптовалюталарнинг қулашига олиб келди», — деган OANDA брокерлик компанияси таҳлилчиси Эдвард Мойя.

Қайд этилишича, ғарб расмийларининг Россия Украина билан чегара яқинида ҳарбий иштирокини кучайтиришда давом этаётгани ҳақидаги хабарлари ортидан АҚШ фонд бозори 17 февраль куни тушиб кетган. Dow Jones Industrial Average индекси йил бошидан бери энг ёмон пасайишини қайд этган.

Мойянинг сўзларига кўра, Россиянинг Украинага бостириб кириши криптовалюталарга босим кучайишига олиб келиши ва қисқа муддатда уларнинг яна 10–15 фоизга тушишига сабаб бўлиши мумкин.

Мутахассис крипто бозорининг ўсиши бўйича узоқ муддатли прогнозни қўллаб-қувватлайди. Лекин агар Федерал захира тизими томонидан кескинлашувнинг ўсиш истиқболларига таъсири кучлироқ бўлса, институционал инвесторлар ставкаларни пасайтириши мумкин.

Шунингдек, 17 февраль куни эълон қилинган Федерал захира тизимининг январь ойи йиғилиши баённомаларига кўра, регулятор 2022 йилда ставкаларни тезроқ оширишга, шунингдек, инфляция юқорилигича қолса, бошқа пул-кредит чораларини кўришга тайёр.

Америка марказий банки раиси Жером Пауэллнинг 25–26 январь кунлари бўлиб ўтган йиғилишдан сўнг сўзлаган нутқи бозорнинг март ойида ставканинг биринчи кўтарилиши ҳақидаги тахминларининг ошишига сабаб бўлганди.

Аввалроқ Intel биткоин майнинги учун оддий процессорлардан 1000 баравар кучли чип яратгани хабар қилинганди. Шунингдек, Уоррен Баффетнинг миллиардер ҳамкори криптовалюталарни тақиқлашга чақиргани ҳақида хабар берилди.