Россиядаги Nissan заводи Россия давлат мулкига айланади
Япония автомобиль ишлаб чиқарувчи концерни активларининг бир қисми Россия мулкига ўтди
Nissan ижроия қўмитаси ўзининг Россиядаги активларини Саноат ва савдо вазирлигига бўйсунувчи Россия Федерациясининг Nissan Manufacturing Рус компаниясига сотишни маъқуллади, дейилади Россия Федерацияси Саноат ва савдо вазирлиги баёнотида.
Қайд этилишича, бунга Nissan’нинг Санкт-Петербургдаги ишлаб чиқариш заводи ва илмий-тадқиқот иншоотлари, шунингдек, Москвадаги савдо ва маркетинг маркази киради.
«Музокаралар натижасида биз корхона ўз фаолиятини давом эттирадиган форматга эришдик: асосий ваколатлар, ишлаб чиқариш цикли ва корхонанинг 2 мингга яқин ходимларининг иш ўринлари сақланиб қолади. ‘АвтоВАЗ’ Nissan автомобилларига сотувдан кейинги хизмат кўрсатиш, шунингдек, эҳтиёт қисмлар етказиб бериш билан шуғулланади», – дейди Саноат ва савдо вазири, бош вазир ўринбосари Денис Мантуров.
Хабарда таъкидланишича, келишув Nissan Manufacturing Рус активларини кейинги 6 йил ичида тасарруф қилиш имкониятини кўзда тутади. Япония компанияси ушбу активларни олти йил ичида қайтариб сотиб олиш ҳуқуқига эга бўлади. Шунингдек, Россия бозорини тарк этиш натижасида Nissan 700 милллион долларга яқин зарар кўриши мумкин, дейилади компания сайтида эълон қилинган хабарда.
Аввалроқ Tesla Хитойда рекорд даражада сотувларни амалга оширгани, шунингдек, Ўзбекистонда маҳаллий электромобил хариди учун олинган кредитнинг бир қисми қоплаб берилиши ҳақида хабар қилинганди.
