Россиянинг «Аэрофлот» компанияси 8 мартдан бошлаб барча халқаро рейсларни вақтинча тўхтатади. Бу ҳақда авиакомпания матбуот хизмати хабар берди.

Маълум қилинишича, қарор парвозларни амалга оширишга тўсқинлик қилувчи қўшимча ҳолатлар юзага келгани билан боғлиқ. Парвозларнинг бекор қилиш «Россия» и «Аврора» авиакомпаниялари жадвалидаги халқаро йўналишларга ҳам тегишли.

Шунингдек, 6 мартдан бошлаб авиакомпания қайтиб кела олмаслик хавфини камайтириш учун Россиядан бориш-келиш чипталари бўлган йўловчиларни рейсларга қўймайди. Бекор қилинган рейсларнинг йўловчилари чипталарини алмаштириши ёки пулларини қайтариб олиши мумкин.

«Рейслар тўхтатилгунга қадар чет элда қоладиган йўловчиларга авиакомпания уларнинг Россияга қайтишини ташкил қилиш учун барча саъй-ҳаракатларни амалга оширади», деб ваъда берди «Аэрофлот» матбуот хизмати.

Қайд этилишича, 8 мартдан кейин авиакомпания Россия ичидаги парвозларни давом эттиради, Ҳаво транспорти федерал агентлиги томонидан ёпилган мамлакат жанубидаги аэропортларга рейслар бундан мустасно. Шунингдек, компания Беларусь пойтахти Минск шаҳрига парвозларини давом эттиради.

Шунингдек, 3 март куни Россиянинг S7 авиакомпанияси ҳам 5 мартдан бошлаб барча халқаро рейслар бекор қилинишини эълон қилганди. Компания сайёҳларга ҳамкор авиакомпанияларнинг рейсларида уйга қайтишга ёрдам берилишини маълум қилди.

Россиянинг Украинага ҳужуми туфайли Европа Иттифоқи санкциялари Россияга Airbus самолётлари ва эҳтиёт қисмларини етказиб бериш, лизинг шартномалари ҳамда кемаларни таъмирлаш ва ўзгартириш бўйича барча суғурта ҳамда қайта суғурта хизматларига тегишли. Бу узоқ масофаларга ташишда қийинчиликларга олиб келади. Жумладан, агар самолётлар чет элга учиб кетса, ҳибсга олиниши мумкин.

Аввалроқ Италияда Россиянинг энг бой миллиардерига тегишли яхта қўлга олингани хабар қилинганди. Шунингдек, Россия 36 та мамлакат билан авиақатновларга чеклов ўрнатгани ҳақида хабар берилди.