Россиянинг Украина ҳудудига ракета ҳужумлари оқибатида мамлакат энергетика объектларининг 30 фоизи ишдан чиқди
Россия 10 октябрь куни Украина бўйлаб ракета зарбалари бериш учун 700 миллион АҚШ доллари сарфлади
Россиянинг 10-11 октябрь кунлари Украина ҳудудига амалга оширилган ракета ҳужумлари оқибатида мамлакат энергетика объектларининг қарийб 30 фоизи ишдан чиққан
Украина энергетика вазири Ҳерман Галушченконинг сўзларига кўра, Россия 10 октябрдан бошлаб Украинага амалга оширган ракета ҳужумлари оқибатида Украина энергетика инфратузилмасининг қарийб 30 фоизи зарар кўрган.
Вазирнинг таъкидлашича, уруш бошлангандан бери Россия Украинанинг энергетика тузилмаларига биринчи марта жиддий ҳужум уюштирмоқда.
Россия Қрим кўпригидаги портлашдан сўнг Украинадаги йирик инфратузилмаларга зарба беришни бошлади. Натижада камида Украинанинг 15 та ҳудудида электр ҳамда сув таъминотида жиддий узилишлар содир бўлди. Шунингдек, бир қатор ҳудудларда интернетга киришда ҳам муаммолар кузатилди.
Россия Мудофаа вазирлиги ракета зарбалари нишонлари Украинадаги энергетика тизимлари бўлганини маълум қилди.
Forbes нашрининг ҳисоблашича, Россия 10 октябрь куни Украина бўйлаб ракета зарбалари бериш учун 400-700 миллион АҚШ доллар сарфлаган. Бу сумма фақат нишонларга теккан 41 ракета ва 11 та дронни ўз ичига олади.
