Samsung компанияси эгилувчан экранга эга, учга букланадиган янги қурилма прототипини намойиш этди. Бу ҳақда Ars Technica хабар берди.

Маълум қилинишича, Samsung компанияси CES 2022 кўргазмасида эгилувчан экранли янги йиғилувчи қурилмаларнинг концепцияларини намойиш қилган. Янги маҳсулотлар қаторига Flex S ва Flex G планшетлари ва клавиатурасиз Flex Note ноутбуки киради.

Таъкидланишича, Flex S ва Flex G Samsung’нинг биринчи иккита эгилиш чизиғига эга қурилмалари ҳисобланади. Flex S гармошка шаклида букланади: очилганда у томонлар нисбати тахминан 16:10 бўлган тўлақонли планшетдир, йиғилганда эса катта смартфонни эслатади ва инсон кафтига сиғади.

Flex G бу кичикроқ қурилма бўлиб, экрани ичкарига букланади. Қурилмани фақат очилган ҳолатда ишлатиш мумкин, лекин букланганда унинг дисплейи ташқи таъсирлардан ва шикастланишдан ҳимояланган.

Шунингдек, Flex Note клавиатурасиз 13 дюймли ноутбук прототипини ҳам намойиш этган. Бу қурилма ҳам эгилувчан экран билан жиҳозланган ва иккига букланади: қурилманинг юқори қисми дисплей вазифасини бажаради, пастки қисмида эса клавиатура, геймпад тугмачалари ёки бошқа исталган бошқарув элементлари акс этиши мумкин. Қурилмани кенгайтирилган шаклда катта планшет сифатида ишлатиш ҳам мумкин.

Қайд этилишича, Flex S, Flex G ва Flex Note тўлиқ функцияли қурилмалар эмас, балки фақат Samsung Display бўлими томонидан ишлаб чиқилган прототиплардир. Смартфон ва планшетларни ишлаб чиқиш учун компаниянинг Galaxy бўлими масъулдир.

Шунга қарамасдан, Samsung бугунги кунда эгилувчан экранли қурилмаларни сотадиган кам сонли ишлаб чиқарувчилардан биридир. 2021 йили Корея компанияси ўзининг Galaxy Z Fold 3 ва Galaxy Z Flip 3 букланадиган смартфонларининг янги авлодини тақдим этган.

Аввалроқ Samsung овозли ёрдамчига эга музлаткични тақдим қилгани ҳақида хабар берилганди.