Сертификатланган дипломли бухгалтерлар халқаро ассоциацияси вакиллари Ўзбекистонга келади
Ташриф жараёнлари 8–11 ноябрь кунлари ўтказилади
Сертификатланган дипломли бухгалтерлар халқаро ассоциацияси (ACCA) вакилларининг Ўзбекистонга ташрифи кутилмоқда. Бу ҳақда Молия вазирлиги матбуот хизмати хабар берди.
Маълум қилинишича, Молия вазирлиги, Аудиторлар палатаси ва Сертификатланган дипломли бухгалтерлар халқаро ассоциацияси (АССА) ўртасида 2020 йил 30 июль куни МҲХС соҳасида мутахассисларни тайёрлаш ва халқаро касбий сертификатлашнинг замонавий тизимини жорий этиш бўйича ўзаро англашув меморандуми имзоланган.
Мазкур меморандум доирасида 2021 йил 8–11 ноябрь кунлари АССА вакиллари Ўзбекистонга ташриф буюради. Ташриф давомида АССА вакиллари билан бир қатор учрашувлар режалаштирилган. Хусусан, улар Молия вазирлиги, олий таълим муассасалари ва АССА аккредитациясидан ўтган ўқув марказлари билан учрашади.
Таъкидланишича, Молия вазирлигининг АССА вакиллари билан учрашуви доирасида Ўзбекистонда МҲХС бўйича мутахассисларни тайёрлаш бўйича истиқболли режалар, ўзаро англашув Меморандуми билан тасдиқланган йўл харитасида назарда тутилган вазифалар ҳамда АССА томонидан киритилган сўнги янгиликлар ва ўзаро фаолиятни янада кенгайтиришга бағишланган масалалар муҳокама қилинади.
Аввалроқ Ўзбекистон банк секторидаги муаммоли кредитлар ҳақида маълумот берилганди.
