Си Цзиньпин Бердимуҳамедовга газ таъминотида «янги босқич»га кўтарилишни таклиф қилди
Туркманистон Пекинга табиий газ етказиб берувчи давлатлар орасида биринчи ўринни эгаллаб турибди.
Хитой раҳбари Си Цзиньпин Туркманистон Президенти Гурбангули Бердимуҳамедовга газ таъминотида «янги босқич»га кўтарилишни таклиф қилди. Бу ҳақда Хитой ташқи ишлар вазирлиги хабар берди.
Маълум қилинишича, Хитой раҳбари Си Цзиньпин 5 февраль куни Туркманистон Президенти Гурбангули Бердимуҳамедовга нефть ва газ соҳасидаги икки томонлама ҳамкорликни «мутлақо янги босқич»га кўтаришни таклиф қилган.
«Хитой томони Туркманистон билан ҳамкорликда яқин келажакда ва узоқ муддатли истиқболда ҳамкорлигимизни режалаштириш билан боғлиқ масалаларни ўрганишни кучайтиришга, газ саноати соҳасидаги ҳамкорлигимизга кўпроқ аҳамият беришга, унинг кўламини кенгайтиришга ва уни бутунлай янги босқичга кўтаришга тайёр», дея иқтибос келтиради Хитой Ташқи ишлар вазирлиги матбуот хизмати.
Таъкидлаганишича, Пекин Ашхобод билан ўзаро манфаатли ҳамкорликка интилади. Си Цзиньпин Туркманистон билан бутун саноат занжирини қамраб олган газ етказиб бериш бўйича ҳамкорликни кенгайтириш тарафдори эканлигини айтган.
«Газ соҳасидаги Хитой-Туркманистон ҳамкорлиги мамлакатларимизнинг ижтимоий-иқтисодий ривожланишига сезиларли рағбатлантирувчи таъсир кўрсатди», — деб қўшимча қилган Си Цзиньпин.
У Бердимуҳамедовни Хитой халқаро майдондаги вазият ўзгаришидан қатъи назар, Туркманистоннинг ишончли дўсти ва ҳамкори бўлиб қолишига ишонтирган. Шунингдек, барча соҳаларда ўзаро манфаатли ҳамкорликни мустаҳкамлашга тайёрлигини билдирган.
Икки томонлама муносабатларни ривожлантиришнинг бошқа муҳим йўналишлари қаторида Си Цзиньпин умумий иммун тўсиғини шакллантириш учун аҳолини коронавирусга қарши эмлаш соҳасидаги алоқаларни мустаҳкамлашни таъкидлаган. Шунингдек, малакали туркман мутахассисларини тайёрлаш бўйича ишларни тезлаштириш ва имкон қадар тезроқ ҳар икки давлатда миллий маданият марказларини ташкил этишни таклиф қилган.
Хитой Бош божхона бошқармаси маълумотларига кўра, Туркманистон Пекинга табиий газ қувурлари етказиб берувчи асосий давлатлар орасида биринчи ўринни эгаллаб турибди. 2021 йилда Хитой бу давлатдан 6,79 миллиард долларлик 24 миллион тонна газ импорт қилган.
Таъминот бўйича Россия иккинчи ўринда туради, Қозоғистон (1,11 миллиард долларлик 4,59 миллион тонна газ), Ўзбекистон (798,98 миллион долларлик 3,25 миллион тонна газ) ва Мьянма (1,41 миллиард долларлик 3,04 миллион тонна газ) кейинги ўринларни банд этган.
Аввалроқ Европа Иттифоқи Озарбайжон билан газ етказиб беришни муҳокама қилиши ҳақида хабар берилганди.