Япониянинг Sony компанияси ва Honda автоконцерни 2022 йил охиригача электромобиль ишлаб чиқарадиган қўшма корхона ташкил этиш ниятида. Бу ҳақда TechCrunch ёзмоқда.

Компаниялар томонидан имзоланган ўзаро англашув меморандумига кўра, 2022 йил охиригача электромобилларни, шунингдек, янги мобиллик хизматларини ишлаб чиқиш ва сотиш бўйича қўшма корхона ташкил этилади.

Қўшма корхона доирасида Honda электромобилларни ишлаб чиқиш, уларни ишлаб чиқариш ва сотишдан кейинги хизматларни ўз зиммасига олади. Sony эса электроника ва хизматлар учун жавобгар бўлади.

Илк моделларнинг сотуви 2025 йилда бошланиши кутилмоқда.

Илгари Sony учта концепт-карни тақдим этганди — 2020 йили Лас-Вегасдаги CES кўргазмасида Sony Vision-S’ни дебют қилинганди, 2022 йилда эса Sony Vision-S 01 лифтбеклари ва Sony Vision-S 02 кроссоверлари намойиши бўлиб ўтган.

Бундан ташқари, январь ойида Sony компанияси Sony Mobility электромобиллар бозорини ўрганиш бўйича компания яратиш режасини эълон қилганди. Ушбу эълондан сўнг ишлаб чиқарувчининг акциялари 4,2 фоизга ўсди.

Аввалроқ Renault, Nissan ва Mitsubishi электромобиль саноатига 23 миллиард доллар сармоя киритиши хабар қилинганди. Шунингдек, Lamborghini электромобиль ишлаб чиқаришга ўтиш учун рекорд сумма ажратгани ҳақида хабар берилди.