SpaceX ракетаси орбитага 46 та янги Starlink сунъий йўлдошини олиб чиқди
Falcon 9 ракетаси Starlink тизимининг глобал интернет қамрови тармоғининг орбитал туркумини тўлдириш учун 46 та мини-сунъий йўлдошдан иборат яна бир партияни орбитага муваффақиятли олиб чиқди. Парвоз Калифорниядаги АҚШ космик кучларининг Ванденберг базасидан амалга оширилган.
Falcon 9 ракетаси Starlink тизимининг глобал интернет қамрови тармоғининг орбитал туркумини тўлдириш учун 46 та мини-сунъий йўлдошдан иборат яна бир партияни орбитага муваффақиятли олиб чиқди. Бу ҳақда «Интерфакс» хабар берди.
Маълум бўлишича, парвоз Калифорниядаги АҚШ космик кучларининг Ванденберг базасидан амалга оширилган. Стартдан 1 соат 3 дақиқа ўтгач, 46 та сунъий йўлдош ракетанинг иккинчи қисмидан паст ер орбитасида (320 километр) ажралиб чиққан. Таъкидланишича, SpaceX муҳандислари қурилмалар фаолиятини текширгандан сўнг, сунъий йўлдошлар ўзидаги ион двигателлари ёрдамида тахминан 560 километр баландликдаги мунтазам орбитага кўтарилади.
Шу билан бирга, сунъий йўлдошларни орбитага олиб чиқишда ўнинчи марта фойдаланилган Falcon 9 ракетасининг қайта фойдаланиш мумкин бўлган биринчи қисми учирилганидан тахминан тўққиз дақиқа ўтгач ерга қайтган. У Ванденберг базасидан бир неча юз километр узоқликда бўлган, Тинч океанида сузиб юрган «Of Course I Still Love You» дрон платформасига бошқариладиган вертикал қўнишни амалга оширган.
Эслатиб ўтамиз, бу Starlink лойиҳаси доирасида 2019 йил май ойидан бери учирилган интернет-сунъий йўлдошларининг 56-партияси ҳисобланади. Ҳозиргача SpaceX 3 минг 55 та Starlink интернет сунъий йўлдошини учирган. Улардан баъзилари муваффақиятсизликка учраган ёки орбитадан чиқиб кетган. Орбитада 2,7 мингдан ортиқ қурилма иш ҳолатида бўлиб турибди.
Ҳозирда компания дунёдаги энг йирик сунъий йўлдош оператори ҳисобланади. Илон Маскнинг сўзларига кўра, интернет тармоғи аллақачон дунёнинг 38 мамлакати, жумладан, Шимолий ва Жанубий Америка, Европа, Узоқ Шарқ ва Океаниядаги фойдаланувчилар учун мавжуд ҳисобланади. Пентагон маълумотларига кўра, бу сунъий йўлдошлар хизматларидан АҚШ ҳарбийлари ҳам фаол фойдаланмоқда. Лойиҳага киритилган сармоянинг умумий ҳажми 10 миллиард долларга баҳоланган.
Аввалроқ SpaceX ракетаси орбитага 53 та янги Starlink сунъий йўлдошини олиб чиққани хабар қилинганди. Унга кўра, Илон Маскнинг 53 та Starlink интернет сунъий йўлдоши бўлган SpaceX Falcon 9 ракетаси Флоридадаги Кеннеди коинот марказидан ҳавога кўтарилган.