Қозоғистон ҳукуматининг 2022 йил 10 октабрдаги қарори билан мамлакатдаги таълим муассасалари талабаларига давлат стипендияларини тайинлаш, тўлаш ва миқдорлари қоидаларига ўзгартиришлар киритилди, деб ёзади «Zakon.kz».

Қарор билан қуйидаги йўналишларда таҳсил олувчиларнинг ойлик давлат стипендия миқдори оширилди:

• Университет талабалари (педагогика ва шифокорлик йўналишида таҳсил олаётган талабалар бундан мустасно) – 36 660 тенге (олдин – 31 423 тенге);

• ОТМнинг ўқитувчи ва шифокорлик йўналишида таҳсил олаётган университет талабалари – 58 800 тенге (олдин – 50 400 тенге);

• Магистратура босқичи талабалари – 86 987 тенге (илгари 76 950 тенге);

• Амалиётчилар – 66 403 тенге (олдин – 59 289 тенге эди);

• Назарбоев университети магистрантлари – 162 500 тенге (олдин – 143 750 тенге эди);

• «Соғлиқни сақлаш» йўналишидаги докторантлар учун – 195 000 тенге (олдин – 172 500 тенге эди);

• «Соғлиқни сақлаш» йўналиши бўйича резидент шифокорлар ва магистрантлар – 100 036 тенге (олдин – 88 494 тенге).

Қайд этилишича, бошқа стипендиялар миқдори ўзгаришсиз қолдирилган.

Маълумот учун Ўзбекистонда 1 Қозоқ тенгесининг расмий курси 13 октябрь ҳолати бўйича 23,24 сўмни ташкил этган.