Сурхондарёдаги «Тўпаланг ГЭС» Россия компанияси билан ҳамкорликда модернизация қилинади
ГЭС 2022 йил фойдаланишга топширилиши режалаштирилган.
Сурхондарё вилоятидаги йирик «Тўпаланг ГЭС» модернизация қилиниб, унинг қуввати 175 мегаваттга етказилади. Бу ҳақда Энергетика вазирлиги матбуот хизмати хабар берди.
Маълум қилинишича, Янги Ўзбекистоннинг 2022–2026 йилларга мўлжалланган Тараққиёт стратегиясида республикада «яшил» энергетика соҳасини келгусида янада ривожлантиришга алоҳида эътибор берилган.
Шу мақсадда, янги қурилаётган ва модернизация қилинаётган гидроэлектр станцияларни ўз вақтида фойдаланишга топшириш юзасидан қатор чора-тадбирлар амалга оширилмоқда.
Хусусан, Сурхондарё вилоятида 2022 йилда фойдаланишга топширилиши режалаштирилган, ишлаб чиқариш қуввати юқори бўлган «Тўпаланг ГЭС»да модернизация ишлари жадаллик билан олиб борилмоқда.
Қайд этилишича, ГЭС фаолияти учун ҳар бирининг қуввати 72,5 мегаватт бўлган 2 та гидроагрегатлар ўрнатилади. Модернизациядан сўнг ГЭСнинг умумий қуввати 175 мегаваттга етказилади. Мазкур модернизация ишлари Россиянинг «Силовые машины» компанияси билан ҳамкорликда амалга оширилмоқда.
Аввалроқ Самарқандда 2022 йил учта янги ГЭС қурилиши хабар қилинганди. Шунингдек, Тошкент вилоятида 150 миллион долларлик ИЭС ишга тушгани ҳақида хабар берилди.
