Ўзбекистонда 2022 йилдан бошлаб босқичма-босқич тадбиркорликка оид барча мажбурий талабларни ягона электрон реестрга киритиш тартиби жорий этилади. Бу ҳақда Янги Ўзбекистоннинг 2022–2026 йилларга мўлжалланган тараққиёт стратегияси тўғрисидаги Президент фармони лойиҳасида сўз боради.

Қайд этилишича, 2022 йилдан бошлаб босқичма-босқич тадбиркорликка оид барча мажбурий талабларни ягона электрон реестрга киритиш тартиби жорий этилади ҳамда такрорловчи ва ўз аҳамиятини йўқотган мажбурий талаблар қайта кўриб чиқилади.

Бунда ягона реестрга киритилган йўналиш бўйича акс эттирилмаган талабларнинг бажарилишини текшириш ва бундай талабларга риоя этмаган тадбиркорлик субъектларини жавобгарликка тортиш тақиқланади.

Адлия вазирлиги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ва Савдо-саноат палатаси билан биргаликда уч ой муддатда ушбу реестрни 2026 йилга қадар тўлиқ шакллантириш юзасидан таклифларни Ўзбекистон Республикаси Президенти Администрациясига киритади.

Аввалроқ Маҳаллабай ишлаш ва тадбиркорликни ривожлантириш агентлигининг асосий вазифалари белгилангани хабар қилинганди.