Tesla’нинг рақобатчиси биринчи литий-ион аккумуляторини ишга туширди
Дунёдаги электр автомобиль аккумуляторларининг аксарияти АҚШ ва Осиёда ишлаб чиқарилади.
Швециянинг Northvolt ишлаб чиқарувчиси Шеллефтео заводида биринчи литий-ионли аккумулятор чиқарилишини эълон қилди. Бу ҳақда CNBC ёзмоқда.
Инвесторлар компанияни 12 миллиард долларга баҳоламоқда. Northvolt’нинг маълум қилишича, бу Европа аккумулятор компанияси томонидан гигафабрикада тўлиқ ишлаб чиқилган ва йиғилган биринчи аккумулятордир.
Гигафабрикани йиллик ишлаб чиқариш гигаватт соат билан ўлчанадиган йирик завод сифатида таснифлаш мумкин. Northvolt Ett компаниясининг Шеллефтеодаги йиллик қуввати 60 ГВт/соатни ташкил қилиши кутилмоқда.
«Албатта, биринчи батарея фақат бошланиши. Келгуси йилларда биз Northvolt Ett компаниясининг Европанинг яшил энергияга ўтишини қўллаб-қувватлаш учун ишлаб чиқариш қувватини сезиларли даражада кенгайтиришини кутамиз», — дейди Northvolt компаниясининг бош директори ва ҳаммуассиси Питер Карлссон.
CNBC’нинг ёзишича, ҳозирда дунёдаги электр автомобиль аккумуляторларининг аксарияти АҚШ ва Осиёда ишлаб чиқарилади, бироқ Northvolt ўзгаришлар киритишга умид қилмоқда.
