The New York Times нашри машҳур Wordle сўз ўйинини сотиб олганини эълон қилди. Бу ҳақда «Интерфакс» хабар берди.

Маълум қилинишича, ўйин унинг яратувчиси, дастурчи Жош Уордлдан сотиб олинган. The New York Times Company ўйинларга алоҳида обуна бўлишига қарамай, ҳеч бўлмаганда дастлаб ўйин эски ва янги ўйинчилар учун бепул бўлиб қолишини ваъда қилган. Компания ўйинни 7 хонали суммага сотиб олганини айтган, бироқ аниқлик киритмаган.

Уордл келишув ҳақидаги маълумотни тасдиқлаган. Яратувчининг сўзларига кўра, Wordle ва The New York Times ўйинлари ўртасидда жуда кўп ўхшашликлар бор. Агар у ва The New York Times Company ўйинларга нисбатан умумий қарашга эга бўлмаганида, ўйинни сотмаган бўларди.

Унинг сўзларидан келиб чиқадики, у Wordle’ни ёлғиз яратган ва қўллаб-қувватлаган, у ўйиннинг машҳурлиги ва аудиториясининг ўсишидан ҳайратда қолган. Шунингдек, энди ўйинни қўллаб-қувватлаш ишини давом эттира олишига ишончи комил эмас. Уордл келишув ёпилгандан кейин ҳам ўйин бепул бўлиб қолишига ва янги эгаларга барча фойдаланувчилар тарихини хавфсиз сақлашга ёрдам беришга ваъда берган.

Wordle ўйини октябрь ойида сайтда рекламасиз пайдо бўлган. 1 ноябрга келиб унинг фойдаланувчилари сони 90 нафарга, январь ўрталарига келиб — 300 мингга етган. The New York Times маълумотларига кўра, ҳозирда уларнинг сони бир неча миллионни ташкил этади.

Ўйин қоидаларига кўра, олтита уринишда бешта ҳарфдан иборат сўзни тахмин қилиш керак. Ҳар бир уринишдан сўнг, дастурий таъминот қайси ҳарфлар тахмин қилинганини ва уларнинг берилган сўздаги ўрни тўғри тахмин қилинганини айтиб беради. Wordle’ни кунига бир марта ўйнаш мумкин.

Аввалроқ Microsoft қарийб 70 миллиард долларга Actvision Blizzard’ни сотиб олиши хабар қилинганди.