Чжан Имин ўрта мактабда ўқиб юрган вақтларида биология фанидан олимпиадага қатнашган ва Пекин университети профессори томонидан ёзилган «Умумий биология» китобини ўқиган. Ўша китоб орқали у организмлар ва экотизимлар гарчи жуда мураккаб бўлиб кўринсада, аслида оддий қонунларга мувофиқ тузилганини тушунган. Шунингдек, у ушбу қонунлар иқтисодиёт ва корхоналар ишлаётган қонунларга ўхшаш, деган хулоса келган.

Чжан Имин ўқишдан мақсад қизиқиш ва эстетикани шакллантириш, деб ҳисоблайди. Унинг фикрича, ҳақиқатан ҳам ўрганишга арзийдиган китобларнинг фақат икки тури мавжуд: биографиялар ва дарсликлар. Дунё тузилиши ҳақидаги тушунчани кенгайтириш учун уларга қўшимча равишда журнал ва газеталар ўқиш мумкин.

TikTok асосчиси таржимаи ҳолларни ўқиш унга қандай таъсир қилгани ҳақида сўзлаб берган: айнан улар тадбиркорга касб танлашда ва касбий йўлни лойиҳалашда ўзини эркин ҳис қилишга имкон берган. У муваффақиятга эришган кўплаб инсонлар ана шундай китоблар туфайли мақсад сари босқичма-босқич боргани, билимини тинимсиз чуқурлаштириш орқали ўз мақсадига эришганини англаб етган.

«Замонавий бизнес ҳақидаги 74 та асосий саволга жавоблар», Жек ва Сюзи Уэлч

Чжан Иминнинг севимли муаллифларидан бири иқтисодчи, сиёсий файласуф ва янги Австрия мактабининг вакили Фридрих Август фон Хайекдир. TikTok асосчисининг севимли китобларидан бири эса тадбиркор ва General Electric компаниясининг собиқ бош директори Жек Уэлч ва унинг рафиқаси Сюзи ҳамда HBR бизнес нашри муҳаррири томонидан ёзилган «Замонавий бизнес ҳақидаги 74 та асосий саволга жавоблар» китобидир.

Ушбу китоб — бизнесни юритиш бўйича кенг қамровли, батафсил қўлланма. General Electric компаниясининг собиқ бош директори ҳар бир инсон ўз карьерасиининг турли босқичларида дуч келадиган мураккаб стратегик, ташкилий ва шахсий муаммолар ҳақида сўзлаб берган.

«Алиса мўъжизалар мамлакатида», Льюис Кэрролл

Чжан Имин ByteDance компаниясининг бош директори лавозимидан кетганида, хайрлашув мактубида у компаниянинг еттинчи туғилган куни Льюис Кэрроллнинг «Алиса мўъжизалар мамлакатида» асаридан иқтибос келтирганини эслатиб ўтган: «Баъзида нонушта қилишдан олдин олтита имконсиз нарсага ишонишим мумкин эди».

TikTok асосчисининг айтишича, кўпчилик шунчаки хаёл ёки фантазия, деб қабул қилган нарсани у имконият сифатида кўради: кўп хаёллар охир-оқибат ҳақиқатга айланади.

Бу эртак абсурд жанридаги адабиётнинг классик намунаси бўлиб, у катталарга ҳам, болаларга ҳам бирдек ёқади. Британиялик математик, шоир ва ёзувчи Чарльз Лютвиж Жонсон Льюис Кэрролл тахаллуси билан сеҳрли дунёга қуён тешиги орқали кириб келган қиз Алиса ҳақида ҳикоя ёзган.

«Юқори самарали одамларнинг етти одати», Стивен Кови

Чжан Иминга таъсир қилган яна бир китоб Стивен Ковининг «Юқори самарали одамларнинг етти одати» китобидир. Тадбиркорнинг фикрича, унда тасвирланган тушунчалар ҳақиқатан ҳам муваффақиятли инсондек фикрлашга ёрдам беради. Айтиш мумкинки, Coca-Cola ва General Motors каби кўплаб йирик компанияларнинг етакчилари Ковининг «шогирдлари» ҳисобланади. Китоб эса The New York Times нашрига кўра бестселлер ҳисобланади.

Стивен Кови томонидан биринчи марта 1989 йилда таърифлаган еттита кўникма бугунги кунда ҳам ўзининг актуаллигини сақлаб қолган. Иқтисодий беқарорликка қарши туриш ва тез ўзгарувчан тенденцияларга мослашиш учун нима керак? Ўзига бўлган ишонч, муҳим нарсаларга эътибор қаратиш қобилияти, хотиржамлик ва етакчилик фазилатлари. Буларнинг барчасига Ковининг китобидаги тамойилларга амал қилиш орқали эришиш мумкин.

• Доим фаол бўлиш.
• Якуний мақсадни тасаввур қила билиш.
• Ҳаракатлар кетма-кетлиги.
• Win-win сиёсати.
• Англашга интилиш.
• Синергияга интилиш.
• Кўникмаларни доимий равишда янгилаш ва ўзига эътибор.