Ўзбекистонда тўқимачилик ва тикув-трикотаж корхоналарига субсидия ҳамда имтиёзли кредитлар ажратилади. Бу ҳақда Norma хабар берди.

Маълум қилинишича, «Тўқимачилик ва тикув-трикотаж корхоналарида чуқур қайта ишлаш ва юқори қўшилган қийматли тайёр маҳсулотлар ишлаб чиқаришни ҳамда уларнинг экспортини рағбатлантириш чора-тадбирлари тўғрисида»ги Президент фармони қабул қилинган.

Фармон билан Тўқимачилик соҳасини қўллаб-қувватлаш жамғармаси ташкил этилган. Шунингдек, фармонга кўра, 2022 йил 1 февралдан 2025 йил 1 январгача Қорақалпоғистон ва вилоятларда бўялган мато ҳамда аралаш ва бўялган газлама маҳсулотларини ишлаб чиқариш лойиҳаларини амалга оширган корхоналарга лойиҳалар доирасида харид қилинган ускуналар қийматининг 10 фоизи, бироқ 500 минг доллар эквивалентидан кўп бўлмаган миқдорда субсидия ажратилади.

Шунингдек, бўялган мато ҳамда аралаш ва бўялган газлама маҳсулотларини ҳамда таркибида сунъий тола 80 фоиздан юқори бўлган ип-калава ишлаб чиқариш ускуналарини харид қилувчи корхоналарга бошланғич 15 фоиз тўловни тўлаш учун хорижий валютада 7 йил муддатгача 3 йиллик имтиёзли давр билан кредит ажратилади.

Шу билан бирга, бўялган мато, бўялган газлама ва тайёр тикув-трикотаж маҳсулотларини экспорт қилувчи корхоналарга хорижий валютада 1 йил муддатгача 9 ойгача имтиёзли давр билан 3 миллион долларгача экспортолди молиялаштириш учун кредит ажратиш кўзда тутилган.

Бундан ташқари, бўялган мато, бўялган газлама ва тайёр тикув-трикотаж маҳсулотларини, шу жумладан комиссионер (ишончли вакил) орқали реализация қилишдан тушган умумий тушумида ушбу маҳсулотларнинг камида 80 фоизини экспорт қилган корхоналарга қуйидаги ҳуқуқлар берилади:

• ижтимоий солиқни 1 фоиз миқдордаги солиқ ставкаси бўйича тўлаш;
• маҳаллий давлат ҳокимияти органларига ариза юбормасдан туриб, солиқ органларини хабардор қилган ҳолда 3 йил муддатгача юридик шахслардан олинадиган мол-мулк солиғи тўловини кечиктириш (бунда, солиқни кечиктириш муддати тугаганидан сўнг солиқ қарзи ва ҳисобланган фоизлар кечиктириш муддатига тенг муддат мобайнида бўлиб-бўлиб тўланади).

Таъкидланишича, 2022 йил 1 февралдан 2025 йил 1 январгача қуйидаги манбалардан келиб тушадиган маблағлар жамғармага йўналтирилади:

• пахта ип-калаваси экспорти учун ундириладиган йиғимнинг 25 фоизи ва трикотаж мато экспорти учун ундириладиган йиғимнинг 100 фоизи;
• пахта ип-калаваси экспорти учун ундириладиган йиғимнинг 70 фоизи.

Фармонга кўра, экспорт қилувчиларнинг экспортолди молиялаштириш учун олинган кредитлари бўйича Тадбиркорлик фаолиятини қўллаб-қувватлаш давлат жамғармаси томонидан компенсация ва кафиллик бериш муддатлари 2024 йил 1 январгача узайтирилди ҳамда ушбу тартиб барча экспортчи корхоналарга татбиқ этилади.

Қайд этилишича, 2022 йил 1 июлгача пахта толасини мажбурий автоматлаштирилган ҳисобга олиш тизими ишга туширилади.

Аввалроқ Наманган тўқимачилик саноати институти ташкил этилиши хабар қилинганди. Шунингдек, Ўзбекистонда лимонзорлар барпо этиш учун субсидия ажратилиши ҳақида хабар берилди.