Тошкент халқаро аэропортида расмий такси хизмати иш бошлади
Тошкент халқаро аэропортида аукцион орқали ғолиб деб топилган такси хизмати иш бошлади. Терминал олдига кириш фақатгина ушбу компания таксиларига мумкин бўлади.
Тошкент аэропорти ҳудудида аукцион орқали ғолиб деб топилган такси хизмати (BOBUR DIYOR компанияси) 12 сентябрь куни иш бошлади. Taxi Airport Tashkent стикерлари туширилган катта ва кенг юкхонага эга янги бензинли автомобиллар учиб келиш зали чиқишида туради.
Такси хизматидан фойдаланиш тартиби: йўловчилар учиб келиш залида ўрнатилган пештахта олдига келиб, манзилини айтади. Менежер тариф бўйича километрни ҳисоблаб чиқади ва тўлаш учун суммани айтади.
Агар нарх йўловчига тўғри келса, у тўловни (нақд ёки банк картаси орқали) амалга оширади ва манзили ва тўланган суммаси кўрсатилган квитанция билан терминалдан чиқиб, биринчи турган таксига ўтиради.
Шунингдек, йўловчи тўғридан-тўғри пештахтани четлаб ўтган ҳолда биринчи турган машинага ўтириб, такси хизматларидан фойдаланиши мумкин.
Аэропортда хизмат корсатиш учун компания «Комфорт», «Бизнес», «Люкс» ва «Премиум» тарифларини жорий қилди.
Мижозларни биринчи қаторда «Комфорт» тарифидаги автомобиллар кутади. Бошқа тарифлардаги автомобиллар иккинчи қаторда туради ёки йўловчининг илтимосига биноан хизмат кўрсатилади.
Қайд этилишича, терминал олдига кириш фақат Taxi Airport Tashkent хизмати учун мумкин бўлади. Бошқа барча таксилар, шу жумладан агрегаторлар орқали ишлайдиган таксилар автотураргоҳлар олдидан йўловчиларни олиб кетиши мумкин бўлади.
Йўловчи ўз ҳайдовчисини тезда топиши учун узоқдан кўринадиган катта белги ўрнатилади, бу такси ва йўловчининг учрашадиган жойи эканини кўрсатади.